वाशिङटन, २५ वैशाख । अमेरिकी राष्ट्रपति डोनल्ड ट्रम्पले इरानसँगको पारमाणविक सम्झौतामा कायम रहने या नरहनेबारे आज साँझ घोषणा गर्ने बताएका छन् ।
लामो समयदेखिका प्रतिबन्ध खुकुलो गर्ने शर्तमा आफ्ना पारमाणविक गतिविधि बन्द गर्ने वाचा गरिएको अन्तर्राष्ट्रिय सहमतिको ट्रम्प कटु आलोचक रहँदै आएका छन् । सहमतिका अन्य हस्ताक्षरकर्ता ब्रिटेन, फ्रान्स र जर्मनीले उनलाई सहमतिबाट पछि नहट्न भनिरहेका छन् । फ्रान्सका विदेशमन्त्रीले ट्रम्पबाट जस्तो निर्णय आए पनि आफूहरू सम्झौताको पक्षमा उभिरहने बताएका छन् ।

हाल वाशिङटनको भ्रमणमा रहेका ब्रिटेनका विदेशमन्त्री बोरिस जनसनले अमेरिकी टेलिभिजनहरूलाई अन्तरवार्ता दिँदै सम्झौतालाई खारेज नगर्न आग्रह गरेका छन् ।

ट्रम्पलाई सहमत गराउने प्रयास गरिरहेका युरोपेली देशहरूले यसै हप्ताको अन्त्यमा इरानसँगको पारमाणविक सम्झौताबारे अमेरिकी निर्णय आउने अपेक्षा गरिरहेको भएपनि ट्विटरमार्फत ट्रम्पले पछिल्लो जानकारी दिएका हुन् । सम्झौतामा अडिग रहन आग्रह गर्दै वाशिङटन पुग्ने ब्रिटेनका विदेशमन्त्री पछिल्ला युरोपेली कूटनीतिज्ञ थिए ।

उनले ट्रम्पसँग भेटघाट गरेका छैनन् । तर ट्रम्पको सबैभन्दा प्रिय केबल समाचार च्यानलको कार्यक्रम ’फोक्स एण्ड फ्रेन्ड्रस’मा उपस्थित भएर आफ्नो सन्देश दिएका छन् ।

उनले सम्झौतामा केही त्रुटिहरू भएपनि त्यसले इरानलाई परमाणु अस्त्र बनाउनबाट रोकिरहेको र अहिले त्योभन्दा अर्को राम्रो उपाय नभएको बताए । तर ट्रम्प प्रशासनका अधिकारीहरूले सम्झौता खारेज गर्ने पक्षमा नै राष्ट्रपति उन्मुख रहेको बताए । सबैभन्दा महत्वपूर्ण प्रश्न चाहिँ इस्लामवादी देशविरुद्ध पुन प्रतिबन्ध लगाउने घोषणा गरिरहँदा ट्रम्पले इरानसँग व्यापार गर्ने अन्य देशहरूविरुद्ध दण्डात्मक कदमहरू पनि समावेश गर्छन कि गर्दैनन् भन्ने हो ।