काठमाडौं, २५ वैशाख । नेपालका लागि ‘सफा चुलो परियोजना कार्यक्रम’ अन्तर्गत धादिङको धुनीबेशी नगरपालिका–६ मा आजदेखि आधुनिक सफा चुलो वितरण सुरु गरिएको छ।

कार्यक्रमको उद्घाटन वडा अध्यक्ष एवं नगर प्रवक्ता रमेश प्रसाद आचार्य र ग्रीनोभा संस्था की प्रबन्धक जननी मगर ले संयुक्त रूपमा गर्नुभएको हो।

चुलो वितरण कार्यक्रमलाई सम्बोधन गर्दै वडा अध्यक्ष आचार्यले यस अभियानबाट दाउरा प्रयोग गर्दै आएका करिब ५०० घरपरिवार प्रत्यक्ष लाभान्वित हुने बताउनुभयो। उहाँले परम्परागत चुलोको प्रयोगले स्वास्थ्यमा नकारात्मक असर पार्नुका साथै वन विनाश र वातावरणीय समस्या बढिरहेको उल्लेख गर्दै सफा चुलोले स्थानीय नागरिकको जीवनस्तर सुधारमा योगदान पुग्ने विश्वास व्यक्त गर्नुभयो।

कार्यक्रममा बोल्दै ग्रीनोभा संस्थाकी प्रबन्धक जननी मगरले विश्वव्यापी रूपमा वातावरणीय संकट गहिरिँदै गएको अवस्थामा नेपालजस्ता मुलुकमा वैकल्पिक र स्वच्छ ऊर्जाको प्रयोग आवश्यक रहेको बताउनुभयो। उहाँले ग्यास अभाव, परम्परागत धुवाँयुक्त चुलोबाट हुने स्वास्थ्य समस्या तथा समयको बर्बादीलाई ध्यानमा राखेर कार्यक्रम सञ्चालन गरिएको जानकारी दिनुभयो।

उहाँका अनुसार सफा चुलोको प्रयोगले नागरिकको स्वास्थ्य संरक्षण, समय बचत, आर्थिक भार न्यूनीकरण तथा वातावरण संरक्षणमा महत्वपूर्ण सहयोग पुग्ने अपेक्षा गरिएको छ।

वडा भरिका ५०० भन्दा बढी घरपरिवारलाई वितरण गरिने यी चुलोहरू चीनका सहयोगी नागरिकहरूको सहयोगमा उपलब्ध गराइएको जनाइएको छ। निःशुल्क रूपमा वितरण गरिएको उक्त चुलो नेपाल आइपुग्दा प्रतिचुलोको लागत १० हजार रुपैयाँभन्दा बढी पर्ने संस्थाका प्रतिनिधिहरूले बताएका छन्।

संस्थाका अनुसार यी चुलोहरू बजारमा सर्वसाधारणले सहज रूपमा खरिद गर्न नपाइने विशेष प्रकारका ऊर्जा–दक्ष उपकरण हुन्। कार्यक्रममार्फत ग्रामीण क्षेत्रमा स्वच्छ ऊर्जा प्रयोगलाई प्रोत्साहन गर्ने र वातावरणमैत्री जीवनशैली विकास गर्ने लक्ष्य राखिएको आयोजकले जनाएको छ।