बागलुङ। प्रतिनिधि सभा निर्वाचन नजिकिँदै गर्दा प्रगतिशील लोकतान्त्रिक पार्टी (प्रलोपा) लाई गण्डकी प्रदेशमा ठूलो झट्का लागेको छ। पार्टीका केन्द्रीय सदस्य तथा गण्डकी प्रदेश अध्यक्ष यज्ञ बल्लभ शर्मा नेपाल कम्युनिष्ट पार्टी (नेकपा) मा प्रवेश गरेका छन्।

जनार्दन शर्माका नजिकका सहयात्री मानिने शर्मा चुनावको मुखमै पार्टी परित्याग गर्दै पुरानै राजनीतिक धरातलमा फर्किएका हुन्। उनलाई नेकपाका नेता दीनानाथ शर्मा र हितमान शाक्यले स्वागत गरेका थिए।

तत्कालीन नेकपा माओवादीबाट अलगिएर जनार्दन शर्माले गठन गरेको प्रलोपामा सक्रिय रहेका शर्मा आइतबार औपचारिक रूपमा प्रलोपा परित्याग गर्दै नेकपामा आबद्ध भएका हुन्।

नेकपामा प्रवेशपछि उनले बाबुराम भट्टराई र जनार्दन शर्माले मार्क्सवादी सिद्धान्त परित्याग गरेको तथा समाजवादी आर्थिक कार्यक्रमसमेत स्पष्ट रूपमा प्रस्तुत गर्न नसकेको आरोप लगाए। प्रलोपाले मार्क्सवादी सिद्धान्त र समाजवादी अर्थनीति त्यागेकाले आफू पुनः नेकपामा फर्किएको उनको भनाइ थियो।

बागलुङका शर्मा भारतमा तत्कालीन नेकपा माओवादीको ‘एकता समाज’ अभियानदेखि नै सङ्गठन निर्माणमा सक्रिय अनुभव भएका नेता मानिन्छन्।

यसैबीच, निसीखोला–१ लेवाङका नेकपा एमालेका गण्डकी प्रदेश सदस्य अमरसिंह घर्ती पनि नेकपामा प्रवेश गरेका छन्। चुनावी माहोल तातिरहेका बेला भएका यी प्रवेशलाई गण्डकी प्रदेशको राजनीतिक समीकरणमा महत्त्वपूर्ण घटनाका रूपमा हेरिएको छ।