काठमाडौं । पुष्पकमल दाहाल ‘प्रचण्ड’ले आगामी फागुन २१ गते हुने निर्वाचनपछि नेकपा देशको पहिलो शक्ति बन्ने र सरकारको नेतृत्व सम्हाल्ने दाबी गरेका छन्।

नुवाकोट–काठमाडौं सम्पर्क समन्वय समितिले आयोजना गरेको कार्यक्रममा सम्बोधन गर्दै उनले पार्टीका नेता–कार्यकर्तालाई युद्धस्तरमा चुनावी अभियानमा खटिन निर्देशन दिए। देशको विद्यमान राजनीतिक अन्योल अन्त्य गर्न सुरुदेखि नै निर्वाचन आवश्यक रहेको अडान आफ्नो पार्टीले लिएको उनले उल्लेख गरे।

उनले भने, “आज सबै राजनीतिक दल चुनावमा होमिएका छन्। सर्वदलीय सरकार र संसद् पुनर्स्थापनाका बहस हराइसके। यस एजेन्डामा नेकपाले अग्रणी भूमिका खेल्यो, र अन्ततः देश नै हाम्रो लाइनमा आयो।”

प्रचण्डले एमालेसँग १० सिटमा चुनावी तालमेल हुन लागेको भन्ने प्रचार निराधार भएको स्पष्ट पारे। “हामी एक्लै अग्निपरीक्षामा उत्रिएका छौं,” उनले भने, “निर्वाचन निष्पक्ष र धाँधलीरहित भए नेकपालाई पहिलो पार्टी बन्न कसैले रोक्न सक्दैन।”

उनले आगामी निर्वाचनलाई देशको राजनीतिक दिशा तय गर्ने निर्णायक मोडका रूपमा व्याख्या गर्दै संगठन सुदृढीकरण, मतदाता भेटघाट र जनअभियानलाई तीव्र बनाउन आह्वान गरे।