काठमाडौं, २१ चैत । प्रधानमन्त्री केपी शर्मा ओलीले कृषि क्षेत्रको उत्पादन चार गुणा वृद्धि गर्ने घोषणा गर्नुभएको छ ।

उहाले सहकारीको माध्यामबाट मात्रै नेपालको कृषि उत्पादनलाई वृद्धि गर्न सकिने पनि स्पष्ट पार्नुभयो । बुधबार काठमाडौंमा दोस्रो सहकारी सम्मेलनको उद्घाटन गर्दै प्रधानमन्त्री ओलीले पछाडि परेको कृषि क्षेत्रलाई अघि बढाउन सहकारी क्षेत्रको महत्व र आवश्यक्ता अपरिहार्य रहेको स्मरण गराउनुभयो । उहाले कृषि क्षेत्रलाई आधुनिकीकरण, व्यवसायिकीकरण गर्न सहकारी क्षेत्रको विकल्प नरहेको तर्क गर्नुभयो ।

प्रधानमन्त्री ओलीले सहकारी क्षेत्रले दिंदै आएको प्रतिफलको चर्चा गर्दै यस क्षेत्रको आवश्यक्ता नेपालका लागि विशेष रहेको पनि उल्लेख गर्नुभयो । उहाले सरकारले टुक्रिएको जमिनलाई एकीकृत गर्दै कृषि उत्पादनमा वृद्धि गर्न चाहेको बताउनुभयो । सहकारी आन्दोलनको महत्व र आवश्यक्ता नेपालका लागि विशेष रहेको प्रधानमन्त्री ओलीको भनाई छ ।

कार्यक्रममा अर्थमन्त्री डा. युवराज खतिवडाले मर्यादित रोजगारीको अवसर सृजना गर्न सहकारी क्षेत्रले सशक्त योगदान दिन सक्ने बताउनुभयो । उहा“ले संविधानले व्यवस्था गरेको समाजवाद उन्मुख अर्थतन्त्र निर्माणका लागि सरकारले सहकारी क्षेत्रसँग सहकार्य गरेर अघि बढने नीति लिएको पनि स्पष्ट पार्नु भयो ।

अर्थमन्त्री खतिवडाले सरकारले आर्थिक लोकतन्त्रको भरपुर उपयोग आम नागरिकले गर्ने अवस्था सृजना गर्न खोजिरहेको पनि बताउनु भयो ।