काठमाडौं, ३१ साउन ।अमेरिकी राष्ट्रपति डोनाल्ड ट्रम्पले रुसी समकक्षी भ्लादिमिर पुटिनसँगको महत्त्वपूर्ण शिखर सम्मेलनअघि रुससँग भविष्यमा हुनसक्ने व्यापारिक सम्बन्धलाई शान्ति स्थापनाको प्रगतिसँग जोड्दै एक सर्त अघि सारेका छन् ।​

अलास्का जाने क्रममा आफ्नो विशेष विमान एयर फोर्स वानुमा पत्रकारहरूसँग कुरा गर्दै राष्ट्रपति ट्रम्पले शान्तिका लागि ठोस प्रगति भएमा मात्र रुससँग व्यापारिक छलफलको ढोका खुल्न सक्ने स्पष्ट पारेका हुन् ।

राष्ट्रपति ट्रम्पले रुसी प्रतिनिधिमण्डलमा उच्चस्तरीय व्यापारीहरूको सहभागिताप्रति सकारात्मक टिप्पणी गर्दै त्यसलाई स्वागतयोग्य भनेका छन् ।

मैले याद गरेको छु, उनले (पुटिनले) रुसबाट धेरै व्यापारीहरूलाई साथमा ल्याइरहेका छन् र यो राम्रो कुरा हो । मलाई यो मन पर्छ किनभने उनीहरू व्यापार गर्न चाहन्छन्, ट्रम्पले भने, तर जबसम्म हामीले युद्ध समाधान गर्दैनौं, तबसम्म कुनै व्यापार हुँदैन ।

ट्रम्पले युद्धु शब्दले कुन द्वन्द्वलाई संकेत गरेका हुन् भन्ने स्पष्ट नपारे पनि यसलाई युक्रेनमा जारी युद्धसँग जोडेर हेरिएको छ । रुसले युक्रेनमाथि आक्रमण गरेपछि रुसमाथि पश्चिमा मुलुकहरूले कडा आर्थिक प्रतिबन्धहरू लगाएका छन् । पत्रकारहरूले रुससँग व्यापारिक अवसरबारे पुनः प्रश्न गर्दा ट्रम्पले आफ्नो अडान दोहोर्‍याए ।

यदि हामीले प्रगति गर्‍यौं भने, म यसबारे छलफल गर्नेछु, किनभने यो उनीहरूले चाहेको चीजहरूमध्ये एक हो, उनले भने, उनीहरूले मैले अर्थतन्त्रको सन्दर्भमा निर्माण गरेको संरचनाको एक हिस्सा बन्न चाहन्छन् ।

अलास्कामा हुन लागेको यो उच्चस्तरीय शिखर वार्ताबाट केही न केही सकारात्मक परिणाम निस्कनेमा आफू आशावादी रहेको पनि ट्रम्पले बताए ।

उनले पुटिनसँग आफ्नो व्यक्तिगत सम्बन्ध राम्रो रहेको र दुवै पक्षमा एकअर्काप्रति सम्मानको भावना रहेको उल्लेख गरे । हेर्नुहोस्, उनी एक चतुर व्यक्ति हुन् । लामो समयदेखि उनले रुसको नेतृत्व गरिरहेका छन्, ट्रम्पले भने, हामीबीच राम्रो सम्बन्ध छ । दुवै पक्षमा एकअर्काप्रति राम्रो सम्मानको स्तर छ र मलाई लाग्छ, यसबाट केही न केही परिणाम निस्कनेछ ।

यो शिखर वार्तामा राष्ट्रपति पुटिनको साथमा रुसका अर्थमन्त्री एन्टोन सिलुआनोभ र रुसको सार्वभौम सम्पत्ति कोषका प्रमुख तथा वरिष्ठ आर्थिक वार्ताकार किरिल दिमित्रिभ जस्ता महत्त्वपूर्ण व्यक्तित्वहरू पनि सहभागी हुँदैछन् ।

यसले रुस आर्थिक सम्बन्ध विस्तारका लागि इच्छुक रहेको संकेत गरेको छ । तर ट्रम्पको पछिल्लो भनाइले कूटनीतिक र शान्ति प्रक्रियालाई नै वार्ताको केन्द्रमा राखेको स्पष्ट देखिन्छ ।

विश्वभरको नजर अलास्कामा हुन लागेको यो भेटवार्तामा केन्द्रित भएको छ, जहाँ दुई शक्तिशाली राष्ट्रप्रमुखहरूबीचको वार्ताले भविष्यको भूराजनीतिक र आर्थिक सम्बन्धको मार्गचित्र कोर्ने अपेक्षा गरिएको छ ।