काठमाडौं, १६ साउन । सार्वजनिक लेखा समितिले दुरसंचार सेवाको विस्तार, गुणस्तर र प्रतिफल कायम हुनेगरी तीन महिने, अर्धवार्षिक र बार्षिक कार्ययोजना बनाउन सरकारलाई निर्देशन दिएको छ ।

समितिको बैठकले दुरसंचार सेवाको विस्तार, गुणस्तर र प्रतिफल कायम हुनेगरी ३ महिने, अर्धवार्षिक र बार्षिक कार्ययोजना बनाई एक हप्ताभित्र समितिमा पेश गर्न नेपाल टेलिकमलाई निर्देशन दिएको हो । लगानी अनुसारको सेवा विस्तार र गुणस्तर कायम हुनेगरी कार्ययोजना बनाई समितिमा पेश गर्न नेपाल टेलिकमलाई पुन: निर्देशन दिनु परेको समितिका सभापति डोरप्रसाद उपाध्यायले जानकारी दिनुभयो ।

समितिले टेलिकमको वित्तीय अवस्था कमजोर भएको पाएपछि लागत कम गर्न र आयवृद्धि हुने गरी योजना बनाउन पनि टेलिकमलाई सचेत गराएको छ ।

समितिले काठमाडौं र पोखरामा विस्तार गरिएको फोरजी सेवा अपेक्षा गरेअनुसार हुन नसक्नुको कारण खोजी गर्न पनि नेपाल टेलिकमलाई सचेत गराएको छ ।

बैठकमा नेपाल टेलिकमकी प्रबन्ध निर्देशक कामिनी राजभण्डारीले फोरजी सेवा विस्तारको कामलाई अब उच्च प्राथमिकता दिने प्रतिवद्धता व्यक्त गर्नु भयो ।