वीरगन्ज १२ असार । पर्सा प्रहरीले ठुलो परिमाणमा प्रतिबन्धित लागू औषध चरेश सहित एकजनालाई पक्राउ गरेको छ । वीरगन्जको परवानीपुर सडक खण्डबाट करिब ३१९ किलो चरेश सहित एउटा ट्रक चालकलाई पक्राउ गरेको हो । धादिङबाट अवैध रुपमा लुकाई छिपाई विरगंज तर्फ जादै गरेको प्रदेश २–०३–००१ ख ६३४८ नम्बरको ट्रक सिर्सिया प्रहरी चौकी र जिल्ला प्रहरी कार्यालय पर्साको क्राईम ब्रान्चको सयुक्त टोलीले ३ सय १९ किलो लागु औषध चरेस नियन्त्रणमा लिएको पर्सा प्रहरी प्रमुख प्रहरी उपरिक्षक गौतम मिश्रले जनाएका छन् ।

उक्त चरेस सहित प्रहरीले ट्रकका चालक मकवानपुरको थाहा नगरपालिका–१२ का ३६ वर्षीय बुद्धिबहादुर स्याङ्तानलाई पक्राउ गरेको छ पर्सा प्रहरीले जनाएको छ । लागु औषध चरेस सहित पक्राउ परेका स्याङ्तानको साथबाट एक लाख ९२ हजार रुपैयाँ नगद समेत बरामद गरिएको प्रहरीले जनाएको छ । परवानीपुरबाट वीरगन्जस्थित सुक्खा बन्दरगाहतर्फ जाँदै गरेको ट्रकबाट उक्त चरेस बरामद गरिएको हो । पर्सा प्रहरी स्रोतका अनुसार, चरेस भारततर्फ लैजान लागिएको थियो । पक्राउ परेका ट्रकका चालक स्याङ्तानलाई आवशयक कार्यबाहीको लागि लागूऔषध कसूरमा मुद्दा चलाउन तयारी भईरहेको जिल्ला अदालत पर्सावाट म्याद थप्ने तयारी भई‌रहेको प्रहरीले जनाएको छ।