दाना,म्याग्दी २८ जेठ। नेपाल कम्युनिष्ट पार्टी (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले मुलुक पुरानो व्यवस्थामा नफर्कने बताएका छन् ।

अन्नपूर्ण गाउँपालिका–३ स्थित ज्ञानप्रकाश नमूना माध्यमिक विद्यालयले आयोजना गरेको कार्यक्रममा अध्यक्ष प्रचण्डले लामो राजनीतिक सङ्घर्ष र जनताको बलबाट स्थापित सङ्घीय लोकतान्त्रिक गणतन्त्रात्मक शासन व्यवस्थाबाट मुलुक पछाडि नफर्कने बताए ।

‘यो व्यवस्थाका कमीकमजोरी सुधार गर्दै अघिबढ्नुपर्छ । राजनीतिक नेतृत्वले जनतामा निराशा नआउने ढङ्गले काम गर्नुपर्छ’, उनले भने ।

साथै उनले जनताका समस्या बुझ्न आफू उनीहरूका घरदौलोमा पुग्ने गरेको उनले बताए । कालीगण्डकी करिडोर चाँडोभन्दा चाँडो पूरा गर्न आफ्नातर्फबाट हरसम्भव प्रयास हुने अध्यक्ष प्रचण्डले बताए ।
कास्की, पर्वत, म्याग्दी र मुस्तांगको जनससम्वन्ध अभियानका लागि गण्डकी प्रदेशमा पुगेको प्रचण्डले दाना तातोपानीमा स्नान गरेर त्यो क्षेत्रलाई अझ बढी पर्यटक आकर्षण गर्नु पर्ने धारणा राखेका छन् ।
प्रचण्डले आज मुस्तांग जिल्लाका विभिन्न कार्यक्रम सहभागी हुंँदै पार्टी जिल्ला कार्यालय भवनको सिलान्यास गर्ने समेत कार्यक्रम रहेको सचिव दीनानाथ शर्माले बताए ।