काठमाडौं, १३ चैत । प्रधानमन्त्री केपी शर्मा ओलीले नेपालस्थित कूटनीतिक नियोगका प्रमुख साथै विकास साझेदारलाई बालुवाटारमा बोलाएर नेपाल स्थायी राजनीतिक युगमा प्रवेश गरेकाले सोही अनुरुपको व्यवहार गर्न अन्तर्राष्ट्रिय समुदायलाई आग्रह गरेका छन्।

विदेशी कूटनीतिक नियोगका प्रमुख र विभिन्न देशका राजदूतलाई देशको समसामयिक अवस्थाबारे बिफ्रिङ गर्दै प्रधानमन्त्रीले यस्तो बताएका हुन्।

जनताका प्रतिनिधिले लेखेको संविधान अनुसार जनताकै मतबाट चुनिएका प्रतिनिधिको सरकार गठन भएको भन्दै प्रधानमन्त्री ओलीले अन्य देशबाट पनि सोही अनुरुपको व्यवहार र सहयोगका लागि आग्रह गरेका छन्।

सोही क्रममा बोल्दै प्रधानमन्त्री ओलीले आफ्नो सरकारका ६ प्राथमिकता पनि सुनाएका छन् । सम्बृद्ध नेपाल र खुसी नेपाली सरकारको लक्ष्य रहेको भन्दै उनले आफ्नो सरकारका ६ प्राथमिकता बताए । जसमा सार्वभौमसत्ता, लोकतन्त्रप्रति प्रतिवद्ध, सामाजिक न्याय र समानता, स्थिरता, सुशासन र जनताको आकांक्षा सम्बोधन रहेका छन् ।

प्रधानमनत्री ओलीले सरकारको पहिलो प्राथमिकता सार्वभौमसत्ता, अखण्डता र राष्ट्रिय हितहरुको संरक्षण भएको बताए ।

नेपाल कुनै पनि बाहृय देशको उपनिवेश नरहेको र सार्बभौमसत्ताको आफ्नो इतिहास रहेको भन्दै उनले भने, यो सरकार राष्ट्रिय हितहरुको संरक्षण गर्न प्रतिवद्ध छ । यसमा कुनै सम्झौता हुँदैन ।’

कूटनीतिज्ञहरुलाई सम्बोधन गर्दै प्रधानमन्त्री ओलीले सरकार लोकतान्त्रिक मूल्यमान्यताप्रति प्रतिवद्ध रहेको बताए ।

लोकतन्त्रका लागि आफूहरुले लामो राजनीतिक संघर्ष गरेको भन्दै स्थिरता र विकास सरकारको प्राथमिकतामा रहेको बताए । उनले त्यसलाई खलल पुर्‍याउने कुनै पनि गतिविधि स्वीकार्य नहुने बताए । प्रधानमन्त्री ओलीले भने, ‘हाम्रो समाजमा हिंसाका लागि कुनै स्थान छैन ।’

ओलीले पूर्वप्रधानमन्त्रीद्वय माधवकुमार नेपाल र झलनाथ खनालका साथै अर्थमन्त्री युवराज खतिवडालाई साथमा राखेर सम्बोधन गरेका थिए ।