काठमाडौं । पर्यटन प्रर्वद्धन गर्ने उद्देष्यका साथ आगामी बैखाशमा ताप्लेजुङको सिरीजङ्घा गाउँपलिकाले विभिन्न कार्यक्रमहरुसहित सिरीजङ्घा पर्यटन महोत्सव आयोजना गर्ने भएको छ ।

हालै पालिकाका उपाध्यक्ष तथा महोत्सव आयोजक समितिका संयोजक डा. चित्र मावोको अध्यक्षतामा सम्पन्न समितिको बैठकले सिरीजङ्घा पर्यटन महोत्सवको कार्यक्रम तालिका र पुरस्कार राशीहरु घोषणा गरेको थियो । सार्वजानिक गरिएको कार्यक्रम तालिका अनुसार जलवायु परिवर्तनको असरबारे अध्ययन गर्न बैशाख ५ देखि १३ गतेसम्म कञ्चनजङ्घा साहसिक पदमार्ग अवलोकन कार्यक्रम, बैशाख १४ र १५ गते स्थानीय याक तथा चौरी प्रर्दशनी कार्यक्रम र बैशाख १५ गते कञ्चनजङ्घा साहसिक हाफ म्याराथन प्रतियोगिता–२०८२ र सोही दिन बेलुका कला, साहित्य तथा संगीत कार्यक्रम आयोजना गरिने बताइएको छ ।
हाफ म्याराथन प्रतियोगिताको विजेतालाई २ लाख ८ हजार ५ सय छयासी रुपैयाँ, उपविजेतालाई १ लाख ८ हजार ५ सय छयासी रुपैयाँ र तेस्रो हुनेलाई ५८ हजार ५ सय छयासी रुपैयाँ नगद पुरस्कार प्रदान गरिने पालिकाले घोषणा गरेको छ । यसैगरी चौरी प्रर्दशनमा सर्वोत्कृष्ट हुनेलाई २ लाख ८ हजार ५ सय छयासी रुपैयाँ र एक जनालाई सान्त्वना पुरस्कारस्वरुप ८ हजार ५ सय छयासी रुपैयाँ प्रदान गरिनेछ । यसै पालिकाभित्र पर्ने विश्वको तेस्रो तथा नेपालको दोस्रो सर्वोच्च शिखर कञ्चनजङ्घाको उचाई ८,५८६ मिटरलाई प्रतिविम्वित गर्ने गरि पुरस्कार राशीहरु निर्धारण गरिएको पालिकाका उपाध्यक्ष तथा सिरीजङ्घा पर्यटन महोत्सव समितिका संयोजक डा. चित्र मावोले जानकारी दिए ।

समुन्द्र सतहबाट झण्डै ४५०० मिटरको उचाइमा आयोजना हुने कञ्चनजंघा साहसिक हाफ म्याराथन प्रतियोगिताको लागि कञ्चनजङ्घा साहसिक पदमार्गमा पर्ने नयाँ झोरेनी, कस्तुरे डाँडाँ, झण्डे डाँडा, सिन्दुरे ढुङ्गा, तुप्लुङ हुदै मछेवासम्मको दुरी कायम गरिएको छ । संघीय सरकारसँगको लागत साझेदारीमा सिरीजङ्घा गाउँपालिकाले निर्माण गरेको कञ्चनजङ्घा साहसिक पदमार्गबाट मकालुदेखि कञ्चनजङ्घासम्मको लामो हिमश्रृंखला अवलोकन गर्दै पदयात्रा गर्न सकिन्छ । यो पदमार्ग पछिल्लो समय निकै लोकप्रिय बन्दै गइरहेको छ ।