काठमाडौं, ३ चैत्र । सी जिनपिङ चिनको राष्ट्रपतिमा पुनः दोस्रो पटक सर्वसम्मतले अनुमोदन भएका छन् । चिनियाँ संसद्ले राष्ट्रपति जिनपिङलाई दोस्रो पाँच वर्षे कार्यकालका लागि सर्वसम्मतिले अनुमोदन गरेको हो। सीका एकजना निकटवर्ती मानिएका तथा भ्रष्टाचारविरोधी पूर्वअधिकारी वाङ चिसानलाई संसद्ले उपराष्ट्रपतिमा नियुक्त गरेको छ।

बेइजिङस्थित ग्रेट हल अफ दि पिपुलमा राष्ट्रपति र उपराष्ट्रपति चयनका लागी मतदान भएको थियो। गत हप्ता चिनियाँ संसद्ले राष्ट्रपतिको कार्यकालसम्बन्धी सीमा संविधानबाट हटाउने पक्षमा मतदान गरेको थियो। जसका कारण जुनसुकै व्यक्ति राष्ट्रपतिमा अनन्तकालसम्म सत्तामा रहन सक्नेछन् । चीनले सन् १९९० को दशकमा राष्ट्रपति पदमा बहाल रहने समयसीमा दुई कार्यकालका लागि तय गरेको थियो।

राष्ट्रपति सीले आफ्ना सम्भावित उत्ताराधिकारी प्रस्तुत गर्ने प्रचलन गत अक्टोबरमा बसेको कम्युनिष्ट पार्टीको महाधिवेशनमा तोडिदिएका थिए। त्यसको सट्टा उहाले राजनीतिक शक्ति आफूमा केन्द्रित गरेका थिए र पार्टीको विधानमा आफ्नो नामसहितको राजनीतिक विचारधारा लेखाउन उहा सफल भएका थिए।