काठमाडौं १३ माघ । उद्योग तथा वाणिज्य र श्रम तथा उपभोक्ता हित समितिले विद्युतीय व्यापारका सम्बन्धमा व्यवस्था गर्न बनेको विधेयक २०८० लाई पारित गरेको छ ।

आज बसेको प्रतिनिधि सभाअन्तर्गतको उद्योग तथा वाणिज्य र श्रम तथा उपभोक्ता हित समितिको बैठकले विधेयकलाई सर्वसहमतिले पारित गरेको हो । समितिका सभापति अब्दुल खानले समितिबाट पारित भएको विधेयक संसदमा पेश गरिने बताउनुभयो ।

समितिको बैठकमा बोल्दै उद्योग वाणिज्य तथा आपूर्तिमन्त्री दामोदर भण्डारीले विगतमा धेरै ऐनहरू बनाउँदा समय सापेक्ष भएरनभएको समीक्षाका आधारमा नयाँ कानून बनाउन आवश्यक रहेको बताउनुभयो ।

विद्युतीय व्यापारका सम्बन्धमा व्यवस्था गर्न बनेको विधेयकले मध्यस्तकर्ता, उत्पादक र बिक्रेतालाई व्यवसायीका रूपमा लिएको छ । विधेयकले अरूको उत्पादनलाई अनलाइन माध्ययमबाट व्यापार गर्ने व्यवस्थासमेत गरेको छ ।