काठमाडौं १९ पुस । अमेरिकाका नवनिर्वाचित राष्ट्रपति डोनाल्ड ट्रम्पले अमेरिका दुनियाँको अगाडि हाँसोको पात्र बनेको टिप्पणी गरेका छन्। उनले यसको दोष सीमा नीति र कमजोर नेतृत्वलाई दिएका छन्।

ट्रम्पले सामाजिक सञ्जालमा गरेको एउटा पोस्टमा राष्ट्रपति जो बाइडेनलाई ‘अमेरिकी इतिहासकै सबैभन्दा खराब राष्ट्रपति’ भनेका छन् ।

‘बाइडेनको खुला सीमा नीति बारे मैले आफ्ना चुनावी र्‍याली र अन्य ठाउँमा धेरैपटक भनेको छु कि यसले अमेरिकामा उग्रपन्थी इस्लामिक आतंकवाद र हिंस्रक अपराधलाई वृद्धि गर्नेछ। यो समय अब आइसकेको छ, जुन कल्पनाभन्दा पनि खराब छ,’ उनले लेखेका छन् ।

नयाँ वर्षको अवसरमा अमेरिकामा घटेका दुई घटनातर्फ संकेत गर्दै ट्रम्पले यस्तो टिप्पणी गरेका हुन् । लुइसियाना राज्यको न्यू अर्लिन्समा एक व्यक्तिले भिडमाथि जानीजानी ट्रक चलाउँदा १५ जनाको मृत्यु हुनुका साथै ३५ जना घाइते भएका थिए ।

यो घटना घटाउने व्यक्ति उग्रवादी समूह इस्लामिक स्टेट ९आईएस० बाट प्रभावित भएको बताइएको छ। त्यस्तै, लस भेगासस्थित ट्रम्प इन्टरनेशनल होटल बाहिर भएको विस्फोटमा एकजनाको मृत्यु हुनुका साथै ७ घाइते भएका थिए ।

ट्रम्पले आफ्नो पोस्टमा लेखेका छन्, ‘न्याय मन्त्रालय, एफबीआई, डेमोक्र्याटहरूद्वारा शासित राज्य र स्थानीय अभियोजकहरूले आफ्नो काम गरेका छैनन् ।’ उनले तिनीहरू असक्षम र भ्रष्ट रहेको आरोप पनि लगाएका छन् ।

‘तिनीहरू सक्षम छैनन् र भ्रष्ट छन्। तिनीहरूले बाह्य र आन्तरिक हिंस्रक तत्वहरूबाट अमेरिकीहरूलाई जोगाउने काममा ध्यान दिनुको सट्टा आफ्ना राजनीतिक प्रतिद्वन्द्वी र ममाथि आक्रमण गर्न समय खर्च गरेका छन्,’ उनले भनेका छन् ।

ट्रम्पले अगाडि लेखेका छन्, ‘देशमा भइरहेको अवस्थाका लागि डेमोक्र्याटहरूले आफूलाई लज्जित महसुस गर्नुपर्छ। धेरै ढिलो हुनुअघि सीआईएले हस्तक्षेप गर्नुपर्छ।’

उनले अमेरिकाको सम्भावित विखण्डन रोक्न बलियो नेतृत्व आवश्यक रहेका बताएका छन् । ‘अमेरिका टुक्रिँदैछ। यसलाई रोक्नको लागि बलियो नेतृत्व चाहिन्छ। २० जनवरीमा भेटौँला।’

२० जनवरीमा डोनाल्ड ट्रम्पले अमेरिकी राष्ट्रपतिको पदको शपथ लिनेछन्। उनले आफ्नो पोस्टको अन्त्यमा आफ्नो प्रसिद्ध नारा ‘मेक अमेरिका ग्रेट अगेन’ लेखेका छन्।