काठमाडौँ, २७ फागुन । प्रधानमन्त्री केपी शर्मा ओलीले भारी दुई तिहाइ बहुमतसहित विश्वासको मत पाउनुभएको छ । संघीय संसदमा आज भएको मतविभाजनमा प्रधानमन्त्रीले २०८ मत पाउनुभएको थियो ।

विश्वासको मतको विपक्षमा कांग्रेसले मात्र मतदान गरेको थियो । विपक्षीमा ६० मत खसेको थियो । कांग्रेसका ६३ सदस्य संसदमा छ ।

२७५ सदस्यीय प्रतिनिधिसभामा आज भएको मतविभाजनमा २६८ सांसदमात्र उपस्थित थिए । राजपाका रेशमलाल चौधरी टिकापुर प्रकरणका दोषी रहेको आरोपमा थुनामा छन् । एक सांसद रहेको नयाँ शक्ति पार्टीका संयोजक बाबुराम भट्टराई देशबाहिर रहेकाले उपस्थित हुन सकेनन् ।

प्रधानमन्त्रीको पक्षमा वाम गठबन्धनका एमाले, माओवादी केन्द्र, राष्ट्रिय जनता पार्टी, संघीय समाजवादी फोरम, राप्रपा, जनमोर्चा र स्वतन्त्र सांसद छक्कबहादुर लामाले मत दिएका छन् ।

संविधानको धारा ७६ को उपधारा ४ मा प्रधानमन्त्री नियुक्ति भएको ३० दिनभित्र प्रतिनिधिसभाबाट विश्वासको मत लिनुपर्ने व्यवस्था छ । फागुन ३ गते ठूलो पार्टीको संसदीय दलको नेताको हैसियतमा गठबन्धनको प्रमुख दल माओवादी केन्द्रको समर्थनमा ओली प्रधानमन्त्री नियुक्त भएका थिए ।