काठमाडौं ५ कात्तिक । भन्सार छलेर ल्याएको सामान पसलबाट बरामद गरेको विरोधमा दार्चुलाको सदरमुकाम खलंगाका व्यापारीले नेपाल(भारत जोड्ने झोलुंगे पुलमा ताला लगाएका छन् ।

उद्योग वाणिज्य संघ दार्चुलाको नेतृत्वमा व्यापारीहरूले जिल्ला सदरमुकाम खलंगास्थित नेपाल–भारत जोड्ने झोलुंगे पुलमा ताला लगाएका हुन् । प्रहरीको सुरक्षा रहने पुलमा व्यापारीले सोमबार ताला लगाएका छन् ।

व्यापारीले भने भन्सार तिरेर भित्र्याएको सामानलाई प्रहरीले अवैध भन्दै छापा मारेर बरामद गरेको भन्दै पुलमा ताला लगाएको बताए ।

उद्योग वाणिज्य संघ दार्चुलाका कार्यवाहक अध्यक्ष विशनसिंह बोहराले पटक–पटक प्रहरीले व्यापारीहलाई दुःख दिएकाले तालाबन्दीमा उत्रिनु परेको बताए । सुरक्षाकर्मीले सामानको भन्सार तिर्न लगाउने र फेरि आफैं व्यापारीको पसल बन्द गराएपछि छापा मार्न आउने बोहराको आरोप छ ।

आइतबार साँझ मात्रै प्रहरीले सदरमुकाम खलंगाको बांगाबगड बजारका दुईवटा पसलबाट भन्सार छलीको सामान बरामद गरेको थियो ।

नेपाल–भारत जोड्ने सदरमुकाम खलंगाको एकमात्र झोलुंगे पुलमा व्यापारीले तालाबन्दी गरेपछि स्थानीयको आवतजावतमा पनि समस्या प‍रेको छ । पुल बन्द भएपछि नेपालबाट भारत र भारतबाट नेपाल आएका मानिसहरू अलपत्र परेका छन् ।