काठमाडौं १५ साउन । काठमाडौं सोमाबार बसेको मन्त्रिपरिषद् बैठकले वाग्मती, लुम्बिनी र कर्णाली प्रदेशका प्रमुख हटाएर नयाँ नियुक्ति गरेको छ । वाग्मतीमा दिपकप्रकाश देवकोटा, लुम्बिनीमा कृष्णबहादुर घर्ती र कर्णालीमा यज्ञराज जोशीलाई प्रदेश प्रमुखमा नियुक्त गरेको हो ।

देवकोटा एमालेका नेता हुन् भने घर्ती र जोशी कांग्रेसका पुराना नेता हुन् । जोशी यसअघि पार्टीको केन्द्रीय सदस्य थिए भने घर्ती रोल्पाका पूर्व जिल्ला सभापति हुन् ।

यसअघि वाग्मतीको प्रमुखमा माधव नेपाल निकट यादव शर्मा, लुम्बिनी प्रदेश प्रमुख माओवादीका अमिक शेरचन र कर्णाली प्रदेश प्रमुखमा पनि माओवादकिा तिलक परियार थिए ।
सचिवको व्यापक फेरबदल
मन्त्रिपरिषद्ले सचिवहरूको सरूवा गरेको छ । अर्थ सचिव मधुकुमार मरासिनीको ठाउँमा राजस्व सचिव रामप्रसाद घिमिरेलाई ल्याइएको छ । मरासिनीलाई उपराष्ट्रपति कार्यालयमा सरूवा गरिएको छ ।

राजस्व सचिवमा उद्योग मन्त्रालयका सचिव दिनेशकुमार घिमिरेलाई जिम्मेवारी दिइएको छ । मन्त्रिपरिषद्ले अन्य मन्त्रालयका सचिवहरूको पनि जिम्मेवारी हेरफेर गरेको छ ।उपराष्ट्रपति कार्यालयकी राधिका अर्याललाई सञ्चार तथा सूचना प्रविधि मन्त्रालयमा ल्याइएको छ । त्यस्तै श्रम मन्त्रालयका घनश्याम उपाध्यायलाई अख्तियार दुरुपयोग अनुसन्धान आयोगमा सरूवा गरिएको छ भने अख्तियारका रामेश्वर दंगाल उद्योगमा सरूवा भएका छन् । श्रम मन्त्रालयमा मुकुन्दप्रसाद निरौलालाई ल्याएको छ । रक्षाका किरणराज शर्मालाई प्राकृतिक स्रोत तथा वित्त आयोगमा सरूवा गरिएको छ ।