काठमाडौँ, १३ फागुन । विभागीय टोली सशत्र प्रहरीको एपीएफ क्लबको महिला र पुरुष टोलीले चौथो एनएसटी/एनभिए राष्ट्रिय महिला तथा पुरुष भलिबल प्रतियोगितामा विजयी सुरुवात गरेको छ ।

आइतबार भएको खेलमा महिलातर्फ एपीएफले नेपाल पुलिस क्लब र पुरुषमा बुढानिलकण्ठ भलिबल क्लबलाई पराजित गरेको हो । त्रिपुरेश्वरस्थित राष्ट्रिय खेलकुद परिषदको कभर्डहल भएको उद्घाटन खेलमा एपीएफले नेपाल पुलिस क्लबलाई ३-० को सोझो सेटमा पराजित गर्यो । एपीएफले पुलिसलाई २५-१६, २७ – २५ र २५ – १४ को सेटमा हराउदै विजय सुरुवात गरेको हो ।

आइतबार नै भएको पुरुषतर्फको खेलमा एपीएफले बुढानिलकण्ठलाई ४ – १ को सेटमा हरायो । एपीएफले बुढानिलकण्ठलाई २५ – ५, २५ – १५, २१ – २५ र २५ – २० ले पाखा लगायो । पुरुषतर्फ नै अर्को खेलमा त्रिभुवन आर्मी क्लबले ढोरपाटन स्पोर्ट्स क्लबलाई ३ – ० को सोझो सेटमा पाखा लगायो । आर्मीले ढोरपाटनमाथी २५ – १५, २५ – १३ र २५ – १३ को सेटमा हरायो ।

नेपाल भलिबल संघको आयोजनामा जारी प्रतियोगितामा महिलातर्फ ७ टोलीले सहभागिता जनाएको छ । पुरुषतर्फ ११ टोलीको सहभागिता रहेको छ । प्रतियोगिताको महिला तथा पुरुष विजेताले १ लाख ५० हजार प्राप्त गर्ने छन् । यस्तै उपविजेताले १ लाख तथा तेस्रो हुनेले ६० हजार पुरस्कार पाउनेछन् ।

प्रतियोगितामा दुवै विधातर्फ सर्वोत्कृष्ट हुने खेलाडीले समान १५ – १५ हजार पाउनेछन् । यस्तै उत्कृष्ट ब्लकर, लिफ्टर, स्पाइकर, लिब्रो, सर्भर र प्रशिक्षकले समान ५ – ५ हजार पाउने छन् ।