काठमाडौं, २ फागुन । नामिबियामा जारी आइसिसी विश्व क्रिकेट लिग डिभिजन टू क्रिकेट अन्तर्गत आफ्नो पाँचौं तथा अन्तिम खेलमा नेपालले क्यानडाबाट एक सय ९५ रनको लक्ष्य पाएको छ।
टस जितेर पहिला फिल्डिङ गर्ने निर्णय गरेको नेपालविरुद्ध क्यानडाले निर्धारित ५० ओभरमा ८ विकेट गुमाएर एक सय ९४ रन जोड्यो। नेपालका बलर बसन्त रेग्मीले तीन र सन्दिप लामिछानेले दुई विकेट लिए। करन केसी र शरद भेषावकरले एक एक विकेट हात पारे।
क्यानडाले पहिलो विकेटका लागि ४६ रनको साझेदारी गरेको थियो। रुविन्दु गुनसेकेरालाई नौ रनमा आउट गर्दै बसन्तले उक्त साझेदारी तोडेका थिए।
क्यानडाले ५७ रन जोड्दा सन्दिपले दोस्रो विकेटका रुपमा कप्तान नितिस कुमारलाई पाँच रनमा आउट गरे। क्यानडाले ६७ रन जोड्दा सन्दिपले पाथिरानालाई दुई रनमा आउट गरे। क्यानडाले ९० रन जोड्दा बसन्तले धालिवाललाई ब्यक्तिगत चार रनमा आउट गरे।
क्यानडाले एक सय ३१ रन जोड्दा करनले पाँचौ विकेटका रुपमा विकेटकिपर हाम्जा तारिकलाई २४ रन आउट गरेका थिए। विजेरत्ना र तारिकबीच पाँचौं विकेटका लागि ४१ रनको साझेदारी भएको थियो।
बसन्तले १० ओभरमा ३४ रन दिए भने सन्दीपले नौ ओभरमा एक मेडन राखेर ४० रन दिए। पारसले सात ओभरमा १६ रन दिए। सोमपाल कामीले नौ ओभरमा एक मेडन राखेर ३८ रन खर्चिए। शरदले सात ओभरमा २१ रन दिए।
सन्दीपले प्रतियोगितामा १६ विकेट लिईसकेका छन्। क्यानडाविरुद्ध सुरुको पाँच ओभरमा केवल ७ रन खर्चिएका सन्दीपले छैटौं ओभरम १४ रन दिएका थिए।
क्यानडाका एक ब्याट्सम्यान रन आउटको शिकार भए। क्यानडाका ओपनर श्रीमान्था विजेरत्नाले शतक बनाए। उनले अविजित एक सय ३ रन जोडे। उनले एक सय ५२ बलमा ८ चौका प्रहार गरे।
विश्वकप छनौट खेल्न नेपालले क्यानडालाई हराउनै पर्ने छ। ६ टोली सहभागी प्रतियोगिताको शीर्ष दुई टोली एकदिवशिय विश्वकपको विश्वस्तरको छनोटमा पुग्नेछन्। तालिकामा नेपाल ६ अंकसहित तेस्रो स्थानमा छ। क्यानडा र नामिबियाको पनि समान ६ अंक भएपनि नेटरनरेटमा दुवै टोली नेपालभन्दा अगाडि छन्।
प्रतिक्रिया दिनुहोस्