काठमाडौं, २८ माघ । अर्जेन्टाइन स्ट्राइकर सर्जियो एग्युरोले ४ गोल गरेपछि म्यान्चेस्टर सिटीले लिसेस्टर सिटीलाई ५–१ गोलको फराकिलो अन्तरले हराएको छ ।

जितपछि म्यान्चेस्टर सिटीले प्रिमियर लिगको शीर्ष स्थानमा १६ अंकको अग्रता कायम गरेको छ । एग्युरोले पछिल्लो १० खेलमा १३ गोल गर्दै सन् २०१८ मा आफू शानदार लयमा रहेको जनाउ दिइसकेका छन् ।

त्यस्तै लिसेस्टरविरुद्धको खेलमा ५ गोलमध्ये ३ गोलका लागि केभिन डी ब्रुयेनले पास उपलब्ध गराएका थिए । ति दुईको प्रदर्शनले इथिहाड रंगशालामा अरु सबैको प्रदर्शन छाँयामा पारिदियो । खेल सुरु भएको तेस्रो मिनेटमै रमिह स्टिर्लिङले ब्रुयेनको पासमा गोल गरेका थिए । २४ औं मिनेटमा डिफेण्डर निकोलास ओटोमण्डीको गल्तिको फाइदा उठाउँदै जेरेमी भर्डीले लिसेस्टरका लागि बराबरी गोल फर्काए ।

तर, दोस्रो हाफ सुरु भएको पाँच मिनेटको बीचमा लिसेस्टरले दुई गोल खायो । ४८ र ५३ औं मिनेटमा एग्युरोले गोल गरी अग्रता ३–१ म पु-याए । र, ७७ औं र ९० औं मिनेटमा गोल थप्दै ह्याट्रिकसहित ४ गोल गर्दा सिटी ५–० ले विजयी भयो ।

लिसेस्टरलाई हराएसंगै म्यान्चेष्टर सिटीले लिगमा १६ अंकको अग्रता कायम गरेको छ । २७ खेलबाट उसको ७२ अंक भएको छ भने दोस्रो स्थानको म्यान्चेस्टर युनाइटडको ५६ अंक छ । उसले १ खेल कम खेलेको छ ।