लुम्बिनी २० भदौ । लुम्बिनी विकास कोषका नवनियुक्त उपाध्यक्ष प्रथम योल्मो खेन्पो (छिमे छिरिङ) डा.ल्हारक्याल लामाले लुम्बिनी गुरुयोजनाको निर्माणको काम एक महिनाभित्र सम्पन्न गर्न निर्देशन दिएका छन् । बुधबार निरीक्षण तथा अनुगमनपछि उनले विकास निर्माण आयोजनाको गुणस्तरीयतामा कायम गरेर तोकिएको समयभित्र काम सम्पन्न गर्न निर्देशन दिएका हुन् ।

लुम्बिनी विकास कोषको गुरुयोजना ४५ वर्षपछि पूरा हुने अन्तिम चरणमा पुगेको छ । तर ठेक्का लिएका कम्पनीले तदारुकताका सथा काम नगर्दा काम भने अधुरै रहेको छ। कोषले दुई वर्षभित्र निर्माण कार्य सम्पन्न गर्न निर्माण व्यवसायीसँग पहिलो चरणको ठेक्का सम्झौता गरे पनि सम्झौताको करिब २ महिना बाँकी रहदा समेत निर्माण कार्य आधा पनि हुन नसकेकोमा कोषका नवनियुक्त उपाध्यक्ष लामाले फिल्डमा गएर निमार्ण कार्यको अनुगमन गरेका हुन् ।

लामाले निर्माण व्यवसायीलाई सचेत गराएको एक हप्तापछि फिल्डमा गएर निमार्ण कार्यको अनुगमन तथा निरीक्षण गरेका हुन् । ठेक्का सम्झौता गरेका निर्माण कम्पनीहरुलाई फिल्डमा बोलाएर एक महिनाभित्र काम सम्पन्न गर्न निर्देशन दिनुको साथै काम सम्पन्न नगरे ठेक्का सम्झौता रद्द गर्ने उनले चेतावनी दिएका छन् ।

कोषले गुरुयोजनाअन्तर्गतका विभिन्न कामका लागि ठेक्का सम्झौता लुम्बिनी अनक खड्का कृष्ण जेभी, लामा एपेक्स कमलजीत जेभी, रमन गजुरमुखी रामजानकी जेभी र खानी अर्घाखाँची बाबुल जेभीसँग अलगअलग ठेक्का सम्झौता गरेको थियो । सन् १९७८ मा जापानी वास्तुकलाविद् प्राध्यापक केन्जो टाँगेले लुम्बिनी गुरुयोजना तयार पारेका थिए । लुम्बिनी गुरुयोजनाका बाँकी काम एकैपटक सक्न ग्लोबल टेण्डर आह्वान गर्न ठेक्का सम्झौता भए पनि अहिले सम्म गुरुयोजना सम्पन्न हुन सकेको छैन ।
नवनियुक्त उपाध्यक्ष लामाले लुम्विनी गुरु योजनाका काम यथासमय सम्पन्न गर्न र अन्य काम अघि बडाउन योजना बनाइरहेको कोषले जनाएको छ ।