काठमाडौं, २२ माघ । राष्ट्रिय खेलकुद परिषद्ले तीनवटा प्रदेशमा स्पोर्ट सिटी बनाउने तयारी गरेको छ। प्रदेश नं १ को इटहरी, ४ को पोखरा र ५ को दाङलाई स्पोर्ट सिटीको रुपमा विकसित गर्ने तयारी गरेकोि राष्ट्रिय खेलकुद परिषदका सदस्य सचिव केशवराज बिष्टले बताए। स्पोर्ट सिटीको सम्भाब्यता अध्ययन गर्न दाङ गएको टोलीमा सहभागी बिष्टले सो बताएका हुन् ।

राखेपका सदस्य सचिव बिष्टले तुलसीपुर उपमहानगरपालीकालाई स्पोर्ट सिटीको रुपमा विकास गर्ने तयारी भइरहेको बताए। स्पोर्ट सिटी बनाउन उपमहानगरपालिकाकासँग छलफल चलिरहेको र केही दिनमा औपचारिक घोषणा गरिने उनले उल्लेख गरे। ‘स्पोर्ट सिटी भयो भने विकास र पहिचानसँगसँगै हुन्छ’, उनले भने, ‘खेलकुदको विकासमा स्थानीय तहले पनि ध्यान दिनेगरी योजना अघि सारिएको हो।’

स्पोर्ट सिटी बनाउन अहिले सम्भाब्यता अध्ययन भइरहेको छ। खेलकुद विकास समितिका अध्यक्ष डिल्लीबहादुर डाँगीको अध्यक्षता एवम् राखेपका सदस्य सचिव बिष्टको प्रमुख आतिथ्यमा कार्यक्रम सम्पन्न भएको थियो।