काठमाडौँ २७ असार । दुई महिनाअघि वीरगन्ज भन्सारबाट छुटाइएको व्यापारिक सामानमा ४ करोड ३८ लाख राजस्व छलिएको राजस्व अनुसन्धान विभागले बताएको छ । ब्रान्डेड जुत्ता, टिसर्टलगायत वस्तुको न्यून मूल्यांकन गराएर रुट्स फेसन प्रालिले आयात गरेको भन्दै व्यापारिक वस्तु बोकेका तीन कन्टेनर हेटौंडाबाट प्रहरीले नियन्त्रणमा लिएको छ ।

सशस्त्र प्रहरीले नियन्त्रणमा लिएर ती कन्टेनरलाई विभागमा बुझाएको छ । भन्सार मूल्यांकन सूचीभन्दा फरक मूल्य घोषणा गरेर कम्पनीले व्यापारिक सामान आयात गरेको विभागको निष्कर्ष छ । प्रज्ञापनपत्र नम्बर एम ५४६३४ बाट आयात गरिएका जुत्ताको प्रतिजोर मूल्यांकन ४५ अमेरिकी डलर हुनुपर्नेमा १५ देखि २० डलर मात्र राखिएको विभागले जनाएको छ । विभागले राजस्व चुहावट नियन्त्रण ऐनअनुसार बिगो २ करोड १८ लाख र बिगोबमोजिमको शतप्रतिशत जरिवाना बराबरको रकम दाबी गरेको हो ।

विभागका महानिर्देशक नवराज ढुंगानाले बिगो र बिगो अनुसारको जरिवानाबापत मंगलबार ४ करोड ३६ लाख बराबर धरौटी माग गर्ने आदेश गरेका छन् । अनुसन्धान अधिकृतले गरेको विस्तृत अनुसन्धानका आधारमा तयार गरेको अन्तिम प्रतिवेदनबमोजिम महानिर्देशक ढुंगानले धरौटी माग गर्ने र उच्च अदालतमा मुद्दा दायर गर्ने आदेश गरेका हुन् ।

महानिर्देशकको आदेशबमोजिम रुट्स फेसनले विभागको मागअनुसारको धरौटीका लागि बैंक ग्यारेन्टी मंगलबार नै उपलब्ध गराएको विभागका सूचना अधिकारी नवराज अधिकारीले जनाए । ‘मागबमोजिमको धरौटी रकम बापतको बैंक ग्यारेन्टी रकम प्राप्त भएकाले थप अनुसन्धानपछि मुद्दा उच्च अदालतमा दायर हुनेछ,’ उनले भने । धरौटी रकमको बैंक ग्यारेन्टी नबुझाए आयातकर्तालाई नै थुनामा लैजानुपर्ने कानुनी व्यवस्था छ ।

विभागका अनुसार रुट्स फेसनले ४ लाख ८८ हजार डलर अर्थात् करिब ६ करोड ३४ लाख बराबरका सामान आयात गरेको थियो । उक्त सामानको भन्सार मूल्यांकनअनुसार वीरगन्ज भन्सारमा रुट्सले २ करोड ९४ लाख राजस्व तिरेको थियो ।