काठमााडौं २१ असार । नेकपा एमालेले प्रधानमन्त्री पुष्पकमल दाहाल प्रचण्डको राजीनामा मागेपछि बचाउमा सत्तारुढ गठबन्धनका दलहरू एक ठाउँमा उभिएका छन्।

प्रधानमन्त्री निवास बालुवाटार बसेको गठबन्धनको बैठकले प्रधानमन्त्रीको राजीनामा माग्ने एमालेको कदम असंसदीय भएको निष्कर्ष निकालेको छ।

‘एमालेले प्रधानमन्त्रीको राजीनामा माग्नु संसदीय मर्यादाबाहिरको कुरा हो,’ गठबन्धनको निष्कर्षबारे माओवादी केन्द्रका महासचिव देव गुरुंगले भने, ‘एमालेले यो गणतन्त्रलाई डिरेल बनाउन खोजेको त होइन भन्ने आशंका जन्माएको छ।’

संसद्‌मा प्रतिप्रश्न गर्ने बाटो खुला हुँदाहुँदै प्रधानमन्त्रीको राजीनामा माग्न नमिल्ने निष्कर्ष गठबन्धनको छ।

‘चित्त नबुझे वा अस्पष्ट भए प्रतिप्रश्न गर्न पाइन्छ, एकैपटक राजीनामा माग्नु संसदीय अभ्यास विरुद्ध छ,’ गुरुङले भने।

बैठकमा प्रधानमन्त्री प्रचण्ड, नेपाली कांग्रेसका सभापति शेरबहादुर देउवा, जसपा अध्यक्ष उपेन्द्र यादव, नेकपा एकीकृत समाजवादीका उपाध्यक्ष राजेन्द्र पाण्डे, नागरिक उन्मुक्ति पार्टीकी अध्यक्ष रञ्जिता चौधरी, लोसपा अध्यक्ष महन्थ ठाकुर, जनमतका अध्यक्ष सीके राउत लगायतका सहभागी थिए।

सोमबार किरणदीप सन्धुद्वारा लिखित पुस्तक ‘रोड्स टु द भ्याली : द लिगेसी अफ सरदार प्रितम सिंह इन नेपालु पुस्तक विमोचन कार्यक्रममा प्रधानमन्त्री प्रचण्डले विवादास्पद अभिव्यक्ति दिएका थिए। उनले आफूलाई प्रधानमन्त्री बनाउन सरदार सिंहले दिल्ली र नेपाल कयौँ पटक राजनीतिक दौडधूप गरेको बताएका थिए।

‘यातायात, सामाजिक सेवा, शिक्षाको क्षेत्रमा मात्रै होइन उहाँ राजनीतिमा पनि रुची राख्नुहुन्छ। उहाँले एकपटक मलाई प्रधानमन्त्री बनाउन धेरै मेहनत गर्नुभयो। धेरैचोटी दिल्ली जानुपनि भयो’, उनले भनेका थिए, ‘काठमाडौँका पार्टीहरुलाई, नेताहरुलाई पार्टीहरुसँग पनि उहाँ लगातार छलफल गर्नुभयो। उहाँ राजनीति सफा भयो भने मात्रै देश विकास राम्रो हुन्छ भन्ने विश्वास पनि गर्नुहुन्छ। म शान्ति प्रक्रियामा आएदेखि नै निरन्तर अन्तरक्रिया, सहकार्य हुने गर्‍यो।’

उक्त अभभिव्यक्तिपछि बुधबार बसेको एमाले संसदीय दलको बैठकले प्रचण्डले पदमा बसिराख्ने हैसियत गुमाइसकेको निष्कर्ष निकालेको थियो। बुधबारै राष्ट्रियसभा बैठक सुरु हुने वित्तिकै राष्ट्रियसभाका एमाले संसदीय दलका नेता देवेन्द्र दाहालले प्रधानमन्त्री दाहालको अभिव्यक्तिप्रति आपत्ति जनाउँदै तत्काल राजीनामा माग गरेका थिए।

एमाले बुधबार दुवै सदनको बैठक अवरुद्ध गरेको थियो।