काठमाडौँ, ३ जेठ । नक्कली भुटानी शरणार्थी प्रकरणमा पक्राउ परेका पूर्वगृहमन्त्री बालकृष्ण खाणको बयान सकिएको छ ।

मंगलबार सरकारी वकिल कार्यालय काठमाडौँमा सरकारी वकिलको रोहबरमा प्रहरीले उनको बयान लिएको हो । उनको बयान राति साढे ९ बजे सकिएको कार्यालय प्रमुख अच्युतमणि न्यौपानेले जानकारी दिए ।

उनका अनुसार बयान मंगलबार बिहान साढे ११ बजेदेखि सुरू भएको थियो । त्यस बेलादेखि सुरू भएको बयान नरोकी बेलुकी साढे ९ बजेसम्म भएको उनले बताए ।

खाणको बयान प्रहरीले सोमबार नै सुरू गरेको थियो । तर, अस्वस्थ भएको भन्दै डेढ घन्टा मात्रै बयान भएको थियो । उनको बयान नभए पनि यस प्रकरणमा पक्राउ परेका नेकपा एमाले सांसद टोपबहादुर रायमाझीको बयान प्रहरीले सोमबार लिएको थियो ।

प्रहरीले रायमाझीको बयान साढे ५ घन्टा लिएको थियो ।

प्रहरीले यस प्रकरणमा १४ जनालाई पक्राउ गरेको छ । अब सोमबार राति पक्राउ परेका पूर्वसभासद आङटावा शेर्पाको बयान लिन बाँकी छ । उनको बयान बुधबार लिने तयारी छ ।

प्रहरीले यस प्रकरणको अनुसन्धान संगठित अपराध कसूरमा गरिरहेको छ । चैत १२ गतेदेखि सुरू भएको अनुसन्धान ६० दिनभित्र मुद्दा अदालतमा दर्ता गर्नुपर्ने प्रावधान छ । अबको एक हप्तामा प्रहरीले अनुसन्धान सकेर मुद्दा दर्ता गर्नुपर्नेछ ।

भुटानी शरणार्थी प्रकरण चर्किँदै गएपछि पूर्वगृहमन्त्री बालकृष्ण खाणले बिचौलियाबाट लिएको रकममध्ये एक करोड रूपैयाँ फिर्ता गरिदिएको तथ्य प्रहरीले फेला पारेको छ ।

उक्त रकम पूर्वगृहमन्त्री खाणले आफ्ना निजी सहायक नरेन्द्र केसीमार्फत् फर्काएको गृहको उच्च स्रोतले सेतोपाटीलाई बताएको छ ।

नक्कली भुटानी शरणार्थी प्रकरणमा गिरोहका प्रमुख सदस्य केशव दुलाल, सानु भण्डारी र टंक गुरूङ चैत १२ गते पक्राउ परेपछि उनीहरूले भटाभट यसमा जोडिएका राजनीतिक र प्रशासनिक मानिसहरूको नाम लिन थालेका थिए ।

भण्डारी, दुलाल र गुरूङ पक्राउ परेपछि उनीहरूको बयान भएको थियो। बयानका क्रममा सानु भण्डारीले गृहमन्त्री खाण लगायत उच्च राजनीतिक एवं कर्मचारीहरूको नाम लिएका थिए। उनीहरूले नाम लिएका ८ जनालाई प्रहरीले समात्यो । खाणको नाम भने गिरोहका सदस्यको बयानबाट हटाइयो ।

त्यसलगत्तै खाणले गिरोहका सदस्यबाट आफूले लिएको रकम फिर्ता गर्ने र भविष्यमा उनीहरूले आफ्नो नाम नलिने चाँजोपाँजो मिलाउन थाले । त्यसको केही दिनमा उनले पिए केसी मार्फत एक करोड रूपैयाँ फिर्ता गरेका थिए ।

गृहको उच्च स्रोतका अनुसार केसीले एक करोड लगेर दिएका व्यक्तिले नै प्रहरी समक्ष आफूले उनीबाट पैसा फिर्ता लिएको बयान दिएका छन् ।

खाणले भने अहिलेसम्म बयानका क्रममा यो विषय स्वीकार गरेको वा नगरेको यकिन छैन । मंगलबार मात्रै प्रहरीले खाणसँग दिनभरि नै बयान लिएको छ ।

पूर्वगृहमन्त्री खाणलाई प्रहरीले गत बुधबार पक्राउ गरेको थियो । उनलाई मैजुबहालस्थित निवासबाट जरूरी पक्राउ पुर्जी जारी गरेर पक्राउ गरिएको थियो । त्यसपछि पक्राउ परेका गृहसचिव टेकनारायण पाण्डेले पनि उनीमार्फत काम गरेको स्वीकार गरेपछि र पाण्डेकै फोनबाट भेटिएका प्रमाण पाएपछि प्रहरी खाणसमक्ष पुगेको थियो ।

खाण भाग्न सक्ने संकेत पाएपछि काठमाडौँ उपत्यका अपराध अनुसन्धान कार्यालयका प्रमुख एसएसपी मनोजकुमार केसीसहितको टोली नै पुगेर उनलाई घरैबाट पक्राउ गरेको हो ।

प्रहरीले यस प्रकरणमा अहिलेसम्म १४ जनालाई पक्राउ गरिसकेको छ ।

पक्राउ पर्नेहरूमा केशव दुलाल, सानु भण्डारी, टंककुमार गुरूङ, सन्देश शर्मा, सागर राई, इन्द्रजित राई, टेकनारायण पाण्डे, बालकृष्ण खाण, उनका पिए नरेन्द्र केसी, टोपबहादुर रायमाझी, सन्दीप रायमाझी, आङटावा शेर्पा, रामशरण केसी र गोविन्द चौधरी छन् ।

यस प्रकरणमा इन्द्रजितका छोरा निरज र पूर्वगृहमन्त्री रामबहादुर थापा बादलका छोरा प्रतिकविरूद्ध पनि पक्राउ पुर्जी जारी भएको छ । उनीहरूलाई प्रहरीले फरार सूचीमा राखेको छ ।

यो प्रकरणमा सबैजसोको बैंक खातामा पीडितले बुझाएका रकमको कारोबारको विवरण भेटिएको छ जुन उनीहरूविरूद्ध बलियो प्रमाण बनेको प्रहरीको दाबी छ ।

प्रहरीले यसमा संगठित अपराध कसूरमा अनुसन्धान गरिरहेको छ । ६० दिनभित्र मुद्दा दर्ता गरिसक्नुपर्ने भएकाले सरकारी वकिलले प्रहरीलाई निर्देशन दिएको छ ।

भुटानी शरणार्थीको पहिचान गर्ने भन्दै २०७६ साल जेठमा बालकृष्ण पन्थीको संयोजकत्वमा कार्यदल बनेको थियो। उक्त कार्यदलका अनुसार शरणार्थीहरू कसैलाई अमेरिका लगायत तेस्रो मुलुकमा पुनर्वास गरिने थिएन ।

कार्यदलको उक्त प्रतिवेदन मन्त्रिपरिषदमा पठाइएको थियो । तर, त्यसमा नक्कली शरणार्थीहरूको नाम थपेर अर्को प्रतिवेदन तयार गरेको पाइएको थियो । गिरोहले राजनीतिक अधिकारीहरूसँग मिलेर नक्कली नाम थपिएको प्रतिवेदन देखाएर उनीहरूलाई विदेश लैजाने भन्दै रकम उठाएको पाइएको हो । उनीहरूले एक व्यक्तिबाट ५ देखि ५० लाख रूपैयाँसम्म उठाएको अनुसन्धान अधिकारीहरूले बताएका छन् ।

यसरी पैसा बुझाएको भन्दै एक सय जनाभन्दा बढी प्रहरीको सम्पर्कमा आएका हुन् ।