काठमाडौँ, ३० वैशाख । अर्जेन्टिनी फरवार्ड लियोनल मेस्सी निलम्बनपछि पहिलो पटक पेरिस सेन्ट जर्मन (पिएसजी)को सुरूवाती ११ मा परेका छन् ।

उनी फ्रेन्च लिग वानअन्तर्गत आज राति हुने एसि आजाक्सियोविरूद्ध मैदानमा उत्रने छन् । पिएसजीका प्रशिक्षक क्रिस्टोफरले मेस्सी खेल्ने जानकारी दिएका हुन् । आफूले मेस्सीसँग कुरा गरेको भन्दै प्रशिक्षक क्रिस्टोफरले उनी एकदमै शान्त र खेल्नका लागि आतुर रहेको उल्लेख गरेका छन् ।

क्लबलाई जानकारी नदिइ साउदी अरेबियाको भ्रमणमा गएको भन्दै पिएसजीले मेस्सीलाई दुई साताका लागि निलम्बन गरेको थियो ।

साउदीको पर्यटकदूत रहेका मेस्सीले गत साता आफ्नो भ्रमणबारे टिममेट र क्लबसँग माफी पनि मागेका थिए । यसअघि भएको ट्रोयजविरूद्धको खेलमा मेस्सीलाई समावेश गरिएको थिएन । मेस्सी गत सोमबार अभ्यासमा फर्किएका हुन् ।

पिएसजीको मैदानमा हुने खेल नेपाली समयअनुसार राति पौने १ बजे सुरू हुने छ ।

मेस्सी पिएसजी छोड्ने मनस्थितिमा छन् । रोयटर्सलाई मेस्सीको नजिकको स्रोतले बताएअनुसार साउदी अरेबियन क्लब अल हिलालबाट उनलाई औपचारिक प्रस्ताव आएको छ । पिएसजीसँगको सम्झौता यसै समरमा सकिँदै छ ।