काठमाडौँ, १३ वैशाख । काठमाडौँ महानगरपालिकाले बिजुलीको खम्बामा रहेका अनावश्यक र प्रयोगविहीन तार हटाउन सेवाप्रदायकलाई १५ दिनको समयसीमा दिएको छ ।

पोलमा गुजुल्टो बनाएर राखेका, चुँडिएका र प्रयोगविहीन तारले शहरको सौन्दर्य बिग्रिएको भन्दै हटाउन निर्देशन दिएको हो । महानगरले सरोकारवाला निकाय र तिनका अधिकारीसँग तार व्यवस्थापन गर्न पटक पटक छलफल र बैठक बसेको थियो । महानगरले सूचना जारी गर्दै ती नियामक निकायसँग छलफल र बैठकको निर्णय कार्यान्वयन गर्न पत्र काटेर ताकेता गरेको जनाएको छ ।

तार व्यवस्थापनका लागि महानगरले सेवाप्रदायकलाई आवश्यक पर्ने समन्वय र सहजीकरणका लागि नियामक निकायलाई पनि अनुरोध गरेको थियो । सूचना अनुसार नियामक निकायलाई गरेको अनुरोधबाट पनि कुनै काम नभएपछि महानगरले सेवाप्रदायकलाई ती तार आफैँ हटाउन निर्देशन दिएको हो । ‘यो सूचना प्रकाशित भएको मितिले १५ दिनभित्र उक्त तार र केवल नहटाइएमा १६औँ दिनपछि महानगरले हटाउनेछ,’ सूचनामा भनिएको छ, ‘यसबाट लाभग्राहीलाई पर्न सक्ने असुविधाको जिम्मेवारी स्वयं सेवाप्रदायकको हुनेछ ।’

अहिले सडक किनाराका धेरै पोलहरू विद्युत् प्राधिकरण र नेपाल टेलिकमका हुन् । सेवाप्रदायकसँग प्राधिकरणको भाडा विवाद लामो समयदेखि चर्किएको छ । यसअघि प्राधिकरणले सेवाप्रदायकलाई पोलको भाडा लिएर तार राख्न दिएको थियो ।

नगर प्रमुखस्तरीय निर्णयबाट टेलिफोन, केबल तथा इन्टरनेट सेवाप्रदायक कार्यालय तथा संघसंस्थाहरू नेपाल टेलिकम, एनसेल, नेपाल विद्युत् प्राधिकरण, केबल प्रसारक संघ लगायतलाई पत्र पठाउँदै तार हटाउन र प्रयोगमा रहेका तार ट्यागिङ गरेर व्यवस्थापन गर्न समय तोकिएको महानगरपालिकाले जनाएको छ ।