काठमाडौँ, १ चैत । अन्तर्राष्ट्रिय क्रिकेट परिषद् (आइसिसी)को नयाँ एकदिवसीय वरीयतामा नेपालले सुधार गरेको छ । आइसिसी क्रिकेट विश्वकप लिग–१ को पछिल्लो समय उत्कृष्ट प्रदर्शन गरेको नेपालले वरीयतामा १६औँ स्थानमा आइपुगेको हो ।

आइसिसीले मंगलबार जारी गरेको एकदिवसीयतर्फको वरीयतामा नेपाल १६औँ स्थानमा उक्लिएको हो । योसँगै नेपालले एकदिवसीय वरीयतामा नामिबिया, युएई, अमेरिका र पपुवा न्युगिनीलाई पछि पारेको छ ।

घरेलु मैदानमा स्कटल्यान्ड र नामिबियासँगको लिग–२ खेल्नुअघि १९औँ स्थानमा रहेको नेपालले त्यसपछिका ११ खेलमा १० जित निकाल्दै आफूलाई तीन स्थान सुधार गरेको हो ।

नेपालभन्दा पछि नामिबिया १७औँ, अमेरिका १८औँ, युएई १९औँ र पपुवा न्युगिनी २०औँ स्थानमा छन् । नेपालभन्दा अघि ओमान १५औँ, नेदरल्यान्ड १४औँ, जिम्बाब्वे १३औँ र स्कटल्यान्ड १२औँ स्थानमा छ ।

नयाँ एकदिवसीय वरीयतामा भारत शीर्ष स्थानमा रहँदा अष्ट्रेलिया दोस्रो स्थानमा छ । त्यस्तै, पाकिस्तान पाँचौँ, दक्षिण अफ्रिका छैटौँ, बंगलादेश सातौँ, श्रीलंका आठौँ, वेस्ट इन्डिज १०औँ र आयरल्यान्ड ११औँ स्थानमा छन् ।

सात राष्ट्र सम्मिलित लिग–२ त्रिकोणात्मक एकदिवसीय सिरिजअन्तर्गत नोपलले बिहीबार अन्तिम खेलमा युएईसँग खेल्दै छ । उक्त खेल जितेमा नेपाल शीर्ष ३ मा रहँदै आगामी जुन–जुलाईमा जिम्बाब्वेमा हुने विश्वकप छनोट खेल्न पाउने छ ।