काठमाडौँ, २९ फागुन । आइसिसी विश्वकप लिग–२ अन्तर्गतको अन्तिम त्रिकोणात्मक सिरिजमा आफ्नो तेस्रो खेलमा नेपालले आज पपुवा न्युगिनी (पिएनजी)सँग प्रतिस्पर्धा गर्दै छ ।

कीर्तिपुरस्थित त्रिवि क्रिकेट मैदानमा हुने खेल बिहान साढे ९ बजेदेखि सुरू हुने छ । सिरिजको पहिलो खेलमा पिएनजीलाई ५२ रनले हराएको नेपाल दोस्रो खेलमा पनि सोही नतिजा दोहोर्‍याउन चाहन्छ ।

पछिल्लो समय उत्कृष्ट लयमा रहेको नेपालले आइतबार युएईलाई १७७ रनको फराकिलो अन्तरले हराउँदै ऐतिहासिक जित हासिल गर्दै ४ वर्षका लागि एकदिवसीय मान्यता जोगाएको थियो ।

सिरिजमा बाँकी २ खेल जितेर नेपाल शीर्ष ३ मा रहेर सोझै विश्वकप छनोटमा स्थान बनाउने योजनामा छ । घरेलु समर्थकको साथमा नेपाली टोली विश्वकप छनोटमा स्थान बनाउँदै अर्को कीर्तिमान गर्ने दाउमा मैदान उत्रन लागेको हो ।

नेपाल त्रिवि क्रिकेट मैदानमा लिग–२ को पछिल्लो ६ खेलयता अपराजित छ । र, पिएनजीविरूद्ध मैदान उत्रिँदा नेपाल सोही लयलाई कायम राख्ने लक्ष्यमा हुने छ ।

नेपालले विश्वकप लिग–२ को अन्तिम खेल चैत २ मा युएईसँग खेल्ने छ ।

उक्त समूह चरणको पुछारमा रहेको पिएनजीले भने खेललाई प्लेअफ छनोट तयारीका लागि लिनेछ । समूह चरणको पुछारमा रहेको पिएनजीले अब विश्वकप छनोटमा स्थान बनाउन प्लेअफ छनोट खेल्नुपर्ने हुन्छ । नेपाललाई जिते पनि पिएनजीको अंक तालिकामा कुनै परिवर्तन हुने छैन ।

लिग–२ मा च्याम्पियन बनेको स्कटल्यान्डले सबै ३६ खेलबाट ५० अंक जोड्दा दोस्रो बनेको ओमानको ४४ अंक छ । स्कटल्यान्ड र ओमान विश्वकप छनोटमा पुगिसकेका छन् । तेस्रो स्थानको नामिबियाको ३६ खेलबाट ३९ अंक छ । नेपालको ३४ खेलबाट ३६ अंक पुगेको छ । बाँकी दुवै खेल जिते नेपालले नामिबियालाई पछि पार्ने छ ।

नेपालको जितले अंक तालिकाको पाँचौँ स्थानमा झरेको अमेरिकाको ३६ खेलबाट ३५ अंक छ । युएई ३४ खेलबाट ३१ अंक जोड्दै छैटौँ स्थानमा छ ।

नेपालसँगको हारसँगै युएईको लिग–२ बाटै एकदिवसीय मान्यता जोगाउने अवसर सकिएको छ । अब बाँकी रहेका दुवै खेलमा जित निकाले पनि अमेरिकासँग हेड टु हेडमा पछि रहेको युएई छैटौँ स्थानमै सीमित हुने छ ।

नेपालले आइतबार युएईलाई पराजित गरेसँगै अमेरिकाको एकदिवसीय मान्यता भने लिग–२ बाटै जोगिएको छ ।