काठमाडौँ, १८ फागुन । नेकपा (एमाले)सहित ७ दलको समर्थनमा प्रधानमन्त्री बनेका नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ अहिले ८ दलीय गठबन्धनका प्रधानमन्त्री बनेका छन् ।

फागुन १३ मा राष्ट्रपतिको उम्मेदवारी दिने अघिल्लो दिन प्रधानमन्त्री प्रचण्ड ८ दलीय गठबन्धनमा सामेल भएका हुन् । प्रधानमन्त्री प्रचण्ड ८ दलीय गठबन्धनका प्रधानमन्त्री भए पनि सरकारमा भने दुई दल मात्र छन् ।

सरकारमा अहिले प्रचण्ड अध्यक्ष रहेको माओवादी केन्द्र र जनमत पार्टी मात्रै सहभागी छन् । राष्ट्रपति निर्वाचनलाई लिएर सत्ता समीकरण फेरिएसँगै सरकारमा दुई दल मात्र रहेका हुन् । राष्ट्रपति निर्वाचनलाई लिएर सरकारको नेतृत्वकर्ता दल माओवादी केन्द्र कांग्रेस नेतृत्वको गठबन्धनमा जोडिन पुगेपछि पुस १० मा बनेको गठबन्धनका साझेदार दल एमाले, राष्ट्रिय स्वतन्त्र पार्टी र राष्ट्रिय प्रजातन्त्र पार्टी (राप्रपा)ले सरकार छोडेपछि सरकारमा २ दल मात्र बाँकी रहेका हुन् ।

पुस १० मा बनेको एमाले नेतृत्वमा बनेको गठबन्धनमा माओवादी केन्द्र, राष्ट्रिय स्वतन्त्र पार्टी, राप्रपा, जनता समाजवादी पार्टी (जसपा), जनमत पार्टी र नागरिक उन्मुक्ति पार्टी रहेका थिए । जसमध्ये जसपा र नागरिक उन्मुक्ति सरकारमा सहभागी भइसकेका थिएनन् । तर, माओवादी केन्द्र, एमाले, राप्रपा, रास्वपा र जनमत गरी ४ दल सरकारमा थिए । तीमध्ये तीन दल एमाले, राप्रपा र रास्वपाले सरकार छाडिसकेका छन् ।

पछिल्लो समय ८ दलीय नयाँ सत्ता समीकरण बने पनि प्रधानमन्त्री प्रचण्डले अरू दललाई सरकारमा सहभागी गराइसकेका छैनन् । अहिलेको समीकरणमा कांग्रेस, माओवादी, नेकपा (एकीकृत समाजवादी), जसपा, लोकतान्त्रिक समाजवादी पार्टी (लोसपा), जनमत, नागरिक उन्मुक्ति पार्टी र राष्ट्रिय जनमोर्चा रहेका छन् ।

राजनीतिक समीकरण फेरिएसँगै प्रधानमन्त्री प्रचण्डले संसद्‌बाट पुनः विश्वासको मत लिने र मन्त्रीमण्डल पुनर्गठनको तयारी गरिरहेका छन् । तर, फागुन २५ मा राष्ट्रपति निर्वाचन मिति रहेकाले त्यसपछि मात्रै विश्वासको मत लिने र मन्त्रीमण्डल पुनर्गठन गर्ने मनस्थितिमा प्रधानमन्त्री प्रचण्ड पुगेका छन् ।

राष्ट्रपति निर्वाचनको आचारसंहिता फागुन १७ गतेदेखि लागु भएपछि त्यसलाई मध्यनजर गरेर प्रधानमन्त्री प्रचण्डले मन्त्रिपरिषद् पुनर्गठन त्यसपछि मात्रै गर्न लागेका हुन् ।