काठमाडौँ, ९ फागुन । नेपाली कांग्रेसका वरिष्ठ नेता रामचन्द्र पौडेललाई राष्ट्रपतिको उम्मेदवार बनाउने भएको छ । फागुन २५ गते हुने राष्ट्रपति निर्वाचनमा कांग्रेसले पौडेललाई उम्मेदवारका रूपमा अगाडि बढाउन लागेको हो ।

सत्तारूढ नेकपा (माओवादी केन्द्र)ले राष्ट्रपति निर्वाचनमा साथ दिने विश्वासका साथ कांग्रेसले पौडेललाई उम्मेदवार बनाउने परिस्थिति बनेको कांग्रेसका नेताहरू बताउँछन् । कांग्रेसका नेता विमलेन्द्र निधिले कांग्रेसबाट पौडेल उम्मेदवार बन्ने सम्भावना प्रवल रहेको बताए ।

उनले भने, “राष्ट्रपतिमा कांग्रेसले उम्मेदवारी दिने औपचारिक निर्णय गरिसकेको छ । राष्ट्रपतिको उम्मेदवारबारे मात्र निर्णय हुन बाँकी छ । रामचन्द्र पौडेल उम्मेदवार हुने ९९ प्रतिशत सम्भावना छ ।”

माओवादीले राष्ट्रपतिमा समर्थन गर्ने निर्णय गरेको भोलिपल्ट कांग्रेसको कार्यसम्पादन समितिको बैठक बसेर पौडेललाई उम्मेदवार बनाइने उनको भनाइ छ । यस्तै, कांग्रेस सभापति शेरबहादुर देउवाको सचिवालयले पनि राष्ट्रपतिको उम्मेदवार पौडेल नै हुने बताएको छ ।

शुक्रबार साँझ सिटौलाले प्रधानमन्त्री पुष्पकमल दाहाल ‘प्रचण्ड’लाई भेटेर राष्ट्रपतिमा सद्भाव खोजेको नेताहरू बताउँछन् । उनले पार्टीका नेताहरूसँग पनि राष्ट्रपतिको उम्मेदवार बन्न भेटघाट तीव्र पारेको पाइन्छ । तर, अहिलेसम्मको परिस्थिति हेर्दा कांग्रेसमा राष्ट्रपतिको उम्मेदवार बन्न पौडेलको पल्ला भारी छ । पौडेलले नेकपा (एकीकृत समाजवादी)का अध्यक्ष माधवकुमार नेपाल र जनता समाजवादी पार्टीका अध्यक्ष उपेन्द्र यादवलाई राष्ट्रपतिमा आफूलाई सहयोग गर्न आग्रह गर्दै आएका छन् । शुक्रबार मात्र पौडेल र जसपाका अध्यक्ष उपेन्द्र यादवबीच भेटवार्ता भएको थियो ।

जसपाको केन्द्रीया कार्यालयमा यादवसँग भएको छलफलमा पौडेलले राष्ट्रपतिमा सहयोग गर्न यादवलाई प्रस्ताव गरेका थिए । यादवले राष्ट्रपतिमा कांग्रेसलाई सघाउन समस्या नरहेको भन्दै उपराष्ट्रपति जसपाले पाउने गरी छलफल थाल्न आग्रह गरेका थिए ।

प्रधानमन्त्री प्रचण्डसँग संवादमा रहेका कांग्रेसका नेताहरू कांग्रेसको उम्मेदवार निर्वाचित हुनेमा विश्वासमा छन् । कांग्रेस उपसभापति पूर्णबहादुर खड्का, महामन्त्री गगन थापा, नेता रमेश लेखकलगायत प्रधानन्त्री प्रचण्डसँग निरन्तर संवादमा छन् ।

शुक्रबार दिउँसो बालकोट पुगेका प्रधानमन्त्री प्रचण्डलाई एमाले अध्यक्ष केपी शर्मा ओलीले १० पुसकै सहमति स्मरण गराएका थिए । जसमा माओवादीले प्रधानमन्त्री पाउँदा राष्ट्रपति र सभामुख एमालेले पाउनुपर्ने सहमति भएको थियो । तर, सहमतिविपरीत प्रधानमन्त्री प्रचण्डले राष्ट्रिय सहमतिको अडान लिएको एमाले नेताहरूको गुनासो छ ।

कांग्रेस महामन्त्री थापका अनुसार प्रधानमन्त्री प्रचण्ड अहिले एमालेलाई राष्ट्रपति दिने मुडमा छैनन् । प्रधामन्त्री प्रचण्डलाई शनिबार भेटेका निधि पनि राष्ट्रपतिमा माओवादीको समर्थन कांग्रेसलाई रहने दाबी गर्छन् ।

आइतबार साँझ कांग्रेसका शीर्ष नेता राष्ट्रपति निर्वाचनमा सहयोग माग्न प्रधानमन्त्रीको सरकारी निवास बालुवाटार पुगेका थिए । कांग्रेस सभापति देउवा, उपसभापति खड्का, धनराज गुरूङ, महामन्त्री थापा तथा नेताहरू पौडेल, सिटौलाले प्रधानमन्त्री तथा माओवादी केन्द्र अध्यक्ष प्रचण्डसँग भेटवार्ता गरेका थिए । राष्ट्रपति निर्वाचन र सत्ता सहकार्यका विषयमा प्रधानमन्त्री प्रचण्ड र कांग्रेस नेताहरूबीच आइतबार २ घन्टा छलफल भएको छ । सो क्रममा प्रचण्डले पार्टीमा छलफल गरेर निर्णय गर्ने बताएका थिए ।

जसअनुसार सोमबार बसेको माओवादी केन्द्रको पदाधिकारी बैठकले राष्ट्रपतिबारै निर्णय लिने जिम्मा प्रचण्डलाई दिएको छ । यद्यपि प्रचण्डले बंठकमा ब्रिफिङ गर्दै पार्टीको जोड यही गठबन्धनलाई अघि बढाउँदै राष्ट्रिय सहमति गर्ने रहेको बताएका थिए ।

राष्ट्रपति निर्वाचनमा माओवादीले कांग्रेसलाई समर्थन गरेको खण्डमा एमालेले सरकारको साथ छाड्न सक्ने अवस्था आउन सक्छ । त्यस्तो अवस्थामा कांग्रेसले माओवादी सरकारको निरन्तरताका लागि लिखित प्रतिबद्धता व्यक्त गर्ने स्रोतको भनाइ छ ।