बाँके, १६ माघ । बाँकेको कोहलपुरमा आफ्नै बाबुले पेट्रोल खन्याएर आगो लगाएर छोराको मृत्यु भएको छ । श्रीमती घाइते छिन् ।

आइतबार साँझ कोहलपुर नगरपालिका–२ का भानुभक्त विकले आफ्नै श्रीमती गंगा विक र २ वर्षीय नाबलक छोरा प्रिन्सलाई पेट्रोल खन्याएर आगो लगाएका थिए ।

जलेर गम्भीर घाइते भएका नाबालक प्रिन्सको भेरी अस्पताल नेपालगञ्जमा उपचारको क्रममा सोमबार बिहान सवा ६ बजे मृत्यु भएको जिल्ला प्रहरी कार्यालय बाँकेले जनाएको छ ।

आइतबार साँझ करिब ७ बजेको समयमा घरायसी झगडामा भानुभक्तले श्रीमती गंगा र छोरा प्रिन्सलाई पेट्रोल छर्किएर जलाएका थिए । त्यसपछि भारततर्फ भागेका उनलाई प्रहरीले गएराति साढे १ बजेतिर नियन्त्रणमा लिएर कारबाही प्रक्रिया अघि बढाएको छ । भारतको नानपारा आसपासबाट नियन्त्रणमा लिएर अनुसन्धान तथा कारबाही प्रक्रिया अघि बढाइएको जिल्ला प्रहरी कार्यालय बाँकेका प्रवक्ता डिएसपी राप्रसाद घर्तीमगरले बताए ।

नाबालकको कम्मरभन्दा माथिको भाग जलेको थियो । श्रीमती गंगाको पनि घाँटी, हात, कानलगायतका भाग जलेको छ । प्रहरीका अनुसार गंगाको शरीरको करिब २० प्रतिशत भाग जलेको छ ।

घटनाबारे जानकारी पाएलगत्तै वडाअध्यक्ष हरि कठायत र उपमेयर संगीता सुवेदीले कोहलपुर नगरपालिकाको एम्बुलेन्सबाट उनीहरूलाई सुरूमा नेपालगञ्ज मेडिकल कलेज पुर्‍याएका थिए । त्यहाँ उपचार सम्भव नहुने भएपछि नेपालगञ्जस्थित भेरी अस्पताल लगिएको थियो ।