काठमाडौं, ४ माघ । नेकपा (एमाले) ले सांसद देवराज घिमिरेलाई सभामुखको उम्मेदवार बनाउने भएको छ। आज १ बजे घिमिरेको उम्मेदवारी दर्ता हुने एमाले उपाध्यक्ष सुवास नेम्वाङले बताए।
अहिले अध्यक्षबाट घिमिरेलाई बनाउने खबर आयो, उनले भने,आज १ बजे उम्मेदवारी दर्ता हुन्छ।२०५६ सालमा राष्ट्रिय सभाका सांसद बनेका घिमिरे यसपटक झापा–२ बाट निर्वाचित भएका हुन्।
उनी एमालेका स्थायी समिति सदस्य तथा प्रदेश इन्चार्ज समेत हुन्।नेकपा एमालेमा घिमिरे कमैमात्र अवसर पाएका नेताका रूपमा चिनिन्छन्।ताप्लेजुङमा जन्मिएका घिमिरे निम्न मध्यम वर्गिय परिवारमा हुर्किएका हुन्। ताप्लेजुङबाट झापामा बसाइसराइ गरेको घिमिरे परिवार अहिले पनि बिर्तामोडमा भाडाको घरमा बस्दै आएको छ। उनको बुवा आमाबाट जन्मिएका १२ छोराछोरीमध्ये घिमिरे माइलो हुन्। घिमिरेकी श्रीमती टीकादेवी बस्नेत भने रिटार्यड शिक्षिका हुन्।
२०३२ सालबाट राजनीतिमा प्रवेश गरेका घिमिरेले धरानको महेन्द्र बहुमुखी क्याम्पसबाट आइएसम्मको मात्र अध्ययन गरेका छन्। काठमाडौंको त्रिचन्द्र कलेजमा भर्ना भए पनि उनले बुर्जुना शिक्षा बहिष्कार गर्ने भन्दै बीचमै पढाइ छाडेका थिए।
उनी एमाले र नेकपा एकीकृतको एकीरणपछि पाँचौ महाधिवेशनबाट बनेको एमालेको केन्द्रीय सदस्य बनेका थिए। २०७८ मा एमालेको दशौं महाधिवेशनबाट उनी पार्टीको स्थायी कमिटी सदस्य रहेका छन्। उनले मदन भण्डारी फाउन्डेशनको कार्यालय प्रमुख भएर फाउन्डेशनको विस्तार समेत गरेका थिए।
प्रतिक्रिया दिनुहोस्