काठमाडौं । उपराष्ट्रपति नन्दबहादुर पुनसँग नेपालका लागि अष्ट्रेलिया र श्रीलंकाका राजदूतले शिष्टाचार भेट गरेका छन् । आज (शुक्रबार) अपरान्ह उपराष्ट्रपतिको कार्यालय, बहादुरभवन कान्तिपथमा उपराष्ट्रपतिसँग अष्ट्रेलियाका राजदूत पिटर बड र श्रीलंकाका राजदूत डब्लु. एस. परेराले छुट्टा–छुट्टै शिष्टाचार भेट गरेका हुन् ।
उपराष्ट्रपतिले दुवै राजदूतसँगको भेटमा नेपालको बढ्दो व्यापार घाटा कम गर्न सहकार्यको क्षेत्रलाई फराकिलो बनाउनुपर्नेमा जोड दिएका थिए । पुनले अष्ट्रेलियाका राजदूतसँगको भेटमा अष्ट्रेलियासँग नेपालको साढे चार अर्ब व्यापार घाटा रहेको उल्लेख गर्दै नेपालको निर्यात वृद्धिका लागि अष्ट्रेलिया सरकारले सहयोग गर्नुपर्ने बताए । उपराष्ट्रपति पुनले ५७ वर्षपछि पहिले औपचारिक रुपमा स्थापित नेपाल र अष्ट्रेलियाको सम्बन्ध अहिले सांस्कृतिक, सामाजिक हुँदै जनस्तरसम्म प्रगाढ बनेको बताए ।
उपराष्ट्रपतिसँगको भेटमा अष्टे«लियाका राजदूत पिटर बडले विश्वकै सुन्दर देश नेपालसँगको सम्बन्धलाई अष्टेलियाले अझै बलियो बनाउन चाहेको बताए । उनले नेपालमा लगानीका लागि अष्टे«लियाको नीजि क्षेत्रलाई सरकारले प्रोत्साहित गरिरहेको बताए ।
उपराष्ट्रपति पुनले श्रीलंकाका राजदूतसँगको भेटमा श्रीलंकाका राष्ट्रपतिको छिट्टै नेपाल भ्रमण हुने आशा गर्दै स्वागतका लागि नेपाली जनता आतुर रहेको बताए । उनले श्रीलंकासँग नेपालको व्यापार घाटा बढ्दो रहेको उल्लेख गर्दै सन्तुलनमा ल्याउन दुवै देशले पहल गर्नुपर्ने बताए ।
उपराष्ट्रपतिसँगको भेटमा श्रीलंकाका राजदूत डब्लु एस परेराले आफ्नो देशका राष्ट्रपतिले छिट्टै नेपाल भ्रमण गर्ने बताएका छन् । दुई देशबीचको सम्बन्ध घनिष्ठ रहेको र श्रीलंकाका राष्ट्रपतिको भ्रमणपछि झनै घनिष्ठ हुने विश्वास व्यक्त गरे । उनले श्रीलंकाका वुद्धिष्ठहरुका लागि नेपाल आस्थाको केन्द्र रहेको उल्लेख गर्दै वार्षिक ५० हजार श्रीलंकालीले लुम्बीनीको भ्रमण गर्ने गरेको बताए ।
एबीसी रिर्पोटर मनोज मगर
प्रतिक्रिया दिनुहोस्