काठमाडौँ, २५ बैशाख । नेकपा एमालेका अध्यक्ष केपी शर्मा ओलीले सरकारको नेतृत्व गरेको नेपाली कांग्रेसको कडा आलोचना गर्नुभएको छ । आगामी ३० गते हुने स्थानीय निर्वाचनमा एमालेलाई मत दिने अपिलका लागि आइतबार पत्रकार सम्मेलन गर्नुभएका ओलीले कांग्रेसले कमजोर तत्वहरुलाई बोकेर उल्टो बाटो समातेको आरोप लगाउनुभयो । आफ्नो सरकार विकासको मार्गमा अघि बढिरहेको बेला कांग्रेसले ब्यवधान खडा गरेको भन्दै ओलीले देशलाई पछाडि फर्काउन कांग्रेसले कमजोर तत्वहरुलाई बोकेको आरोप लगाउनुभयो ।

कांग्रेसले लोकतन्त्र, संसदीय मूल्य मान्यता र राजनीतिक दलको आधारभूत मर्ममाथि प्रहार गरेको आरोप पनि लगाउनुभयो । आफ्नो सरकारका सामु ताजा जनादेशका लागि जनतामा जाने बाहेक विकल्न नरहेको जिकीर गर्दै उहाँले अदालतको परमादेशबाट बनेको सरकारले देशलाई नै बन्धक बनाएको आरोप लगाउनुभयो ।

एमाले बाहेकका अन्य पार्टीहरु अन्योल र अनिश्‍चयबाट ग्रसित भएको जिकीर गर्दै ओलीले राष्ट्रिय एकता कमजोर पार्ने र देशभक्तिलाई होच्याउने कुरा एमालेलाई स्वीकार्य छैन भन्नुभयो । नेकपा एमालेले शुरु गरेका काम पूरा भए मात्रै देशमा समृद्धि आउने भन्दै उहाँले त्यसका लागि स्थानीय तहमा पनि एमालेकै सरकार आवश्यक हुने बताउनुभयो ।