चितवन, २५ पुस । चितवनको पर्साबजारका व्यवसायीहरुले बारामा शितलहरबाट पीडितहरुलाई सोमबार न्यानो कपडा बितरण गरेका छन् ।

तराईमा अत्याधिक चिसो बढेर केहीको मृत्यु समेत भएपछि पर्साका व्यवसायीहरुले करिब १० लाख बराबरको न्यानो कपडा संकलन गरेका थिए ।

व्यवसायीहरुको एक समुहले आन्तरीक रुपमा पिकनिकको लागी मेरो बचत समुहमा बचत गर्दै आएकोे नगद एक लाख रुपैयाको ब्यालङ्केट र टोपी खरिद गरेका थिए भने अन्य कपडाहरु पर्सा बजारकै व्यवसायीबाट जिन्सी नै संकलन गरेका थिए ।

संकलित न्यानो कपडाहरु चेपाङ्ग समुदायको बाहुल्यता रहेको बाराको निजगढ नगरपालिका १३ भत्तलालमा , बाराकै कोल्हवी नगरपालिका वडा नम्बर ९ र वडा नम्बर २ बगीवाह स्थित विपन्न मुसहर बस्तीमा बितरण गरेको थियो । व्यवसायीहरुले ब्यालङ्केट , टोपी , स्वीटर , ज्याकेट , पछ्यौरा, पाइन्ट लगायतको सामाग्री जनप्रतिनिधी , प्रहरी र पत्रकारको रोहोबरमा बितरण गरेका थिए ।

सोमबार मात्रै करिब ५ लाख मुल्य बराबरको न्यानो कपडा ४ सय जनालाई बितरण गरिएको थियो । बाकी करिब ५ लाख बराबरकै कपडाहरु अन्य पिडितहरुलाई बितरणको लागी रौतहटका समाजसेवी रिक्सा चालक केदार तिमिल्सीनालाई जिम्मा लगाइएको न्यानो कपडा बितरण कार्यक्रमका संयोजक अर्जुन लम्सालले जानकारी दिए ।

रौतहटका समाजसेवी तिमिल्सीनाको समन्वयमा खैरहनीका व्यवसायीहरु न्यानो कपडा बितरणको लागी बारा पुगेका थिए । कपडा बितरण गर्दा विपन्न बर्गका बालबालिका र बृद्धबृद्धाहरुलाई प्राथमिकता दिइएको लम्सालले बताए । व्यवसायीहरुको अभियानमा खैरहनीका समाजसेवी मुरलीप्रसाद गजुरेल पनी सहभागी भएका थिए ।

अत्याधिक चिसोको मारमा परेका विपन्न समुदायका स्थानियहरु न्यानो कपडा पाएपछि खुसी भएका छन् ।