२० जेठ, काठमाडौं । सरकारले चुरे सम्बन्धी बजेट वक्तव्य नसच्याए तराई मधेशको चुरे संरक्षण र प्राकृतिक सम्पदाको रक्षार्थ प्रदेश सरकारले आवश्यक निर्णय लिने चेतावनी प्रदेश २ का मुख्यमन्त्री लालबाबु राउतले दिएका छन् ।

मुख्यमन्त्री राउतले नेपाल सरकारको यस्तो अदुरदर्शी निर्णयले प्रदेश २ बाट ढुंगा, गिट्टी, वालुवा उत्खनन गर्ने योजनाले देशकै अन्न भण्डारणको रुपमा रहेको प्रदेश २ को सम्पूर्ण भू–भाग मरुभूमिकरण भई शतप्रतिशत जनताको बिल्लीबाठ हुने समेत बताएका छन् ।

प्रदेश २ का जनता प्रत्येक वर्ष बाढी, पहिरो, पानीको समस्या र कृषि उपज समेतको समस्याबाट प्रताडित हुँदै आएको तथा चुरे क्षेत्रको माटो एकदमै कमजोर रहेको बताउँदै कमजोर भू–बनौटका अनुसार त्यहाँका ढुुंगा गिटी निकालियो भने नदीको बहाव तीब्र हुने र तिब्र बहावका कारण ल्याउने बालुवा मधेशमा थुप्रिदै जाने निश्चित रहेको मुख्यमन्त्री राउतद्धारा जारी विज्ञप्तिमा भनिएको छ ।

‘चुरे क्षेत्र बालुवा गिट्टीको स्रोत मात्र नभई प्राकृतिक सम्पदामा समेत धनी छ । यहाँको प्रदेश सरकार मातहत रहेको वन सम्पदाको ठूलो हिस्सा चुरे भावर क्षेत्रमा नै रहेकाले चुरे दोहनले यी सबै प्राकृतिक सम्पदाले आफ्नो वासस्थान गुमाउने निश्चित छ ।’ विज्ञप्तिमा भनिएको छ ।