काठमाडौँ ११ पुस । औद्योगिक क्षेत्र निर्माणको अध्ययन गर्न चीनको ल्हासास्थित आर्थिक तथा प्राविधिक विकास क्षेत्रका विज्ञ टोली नेपाल आइपुगेका छ ।
झापाको दमकमा ‘चीन नेपाल यू ई इन्डस्ट्रियल पार्क’ निर्माणका लागि समझदारीपत्र बारे छलफलका लागि ९ सदस्यीय टोली सोमबारनै नेपाल आइपुगेको नेपालको औद्योगिक क्षेत्र व्यवस्थापन लिमिटेडका अध्यक्ष नन्दकिशोर बस्नेले जानकारी दिए । उनअनुसार टोलीले स्थलगत अध्ययन गरी एमओयूबारे छलफल गर्नेछ ।

ल्हासाको आर्थिक तथा प्राविधिक विकास क्षेत्रको कार्यकारी समितिका उपसचिव लिउ रुपेङको नेतृत्वमा अध्ययन टोली नेपाल आएको हो । ‘झापाको २२ सय बिघा क्षेत्रमा चीनले औद्योगिक पार्क निर्माण गर्ने प्रारम्भिक समझदारी भइसकेको छ,’ उनले भने, ‘बृहत् समझदारीका लागि पार्क क्षेत्रको अध्ययन र हाम्रो सरकारका अधिकारीहरूसँग छलफल गर्न टोली नेपाल आइपुगेको हो ।’ सरकारी स्वामित्व रहेको ल्हासाको आर्थिक तथा प्राविधिक विकास क्षेत्रका आर्थिक, प्राविधिक, योजना र निर्माणसँग सम्बन्धित प्राविधिकहरू टोलीमा सहभागी छन् । उक्त टोलीसँगै नेपालको औद्योगिक क्षेत्र व्यवस्थापन लिमिटेडको ११ सदस्यीय अधिकारीहरू सहभागी हुनेछन् ।

उक्त टोलीले पूर्वप्रधानमन्त्री केपी शर्मा ओली, उद्योगमन्त्री सुनीलबहादुर थापा, सचिव यमकुमारी खतिवडा, लगानी बोर्डका प्रमुख कार्यकारी अधिकृत (सीईओ) महाप्रसाद अधिकारी, दमक नगरपालिकाका मेयर रोमथान ओली, इन्डस्ट्रिज पार्कका अध्यक्ष गोविन्द थापा र औद्योगिक क्षेत्र व्यवस्थापन लिमिटेडका अधिकारीहरूबीच भेटघाट गरी छलफल गर्नेछ ।

नेपालमा हाल ११ औद्योगिक क्षेत्र सञ्चालनमा छन् । सरकारले प्रत्येक प्रदेशमा कम्तीमा एउटा औद्योगिक क्षेत्र खोल्ने घोषणा गरेको छ । यसमध्ये नेपाल सरकारले झापाको दमक, मकवानपुरको मयुरधाप, रूपन्देहीको मोतीपुर, बाँकेको नौबस्तामा औद्योगिक क्षेत्रहरू स्थापना गरी जग्गा औद्योगिक क्षेत्र व्यवस्थापन लिमिटेडको स्वामित्वमा ल्याइसकेको छ । गत वैशाख ३१ गते बेइजिङमा भएको विभिन्न राष्ट्र प्रमुख सम्मिलित बैठकमा नेपालका तर्फबाट तत्कालीन उपप्रधान तथा परराष्ट्रमन्त्री कृष्णबहादुर महराले इन्डस्ट्रियल पार्क बनाउने विषयमा हस्ताक्षर गरिसकेका छन् । यो पार्कमा करिब तीन सय अर्ब रुपैयाँ लगानीको अनुमान गरिएको छ ।
‘एमओयूका लागि हाम्रोतर्फबाट उद्योग, अर्थ, कानुन र परराष्ट्र मन्त्रालयबाट सहमति प्राप्त भइसकेको अध्यक्ष बस्नेत जानकारी दिएका छन् । चिनिया टोलीसँग छलफल गरेर अन्तिम रूप दिई मन्त्रिपरिषदबाट निर्णय गराई सम्झौता बताए । आगामी बुधबार झापाको प्रस्तावित औद्योगिक क्षेत्रको अवलोकन गरी शुक्रबार चीन फर्कने कार्यक्रम रहेको उनले बताए ।