पोखरा, १४ बैशाख । सांसदहरूको पिसिआर परीक्षण गर्न माग गर्दै गण्डकी प्रदेशसभाको विशेष अधिवेशन नेकपा एमालेका सांसदहरूले अवरोध गरेका छन्।प्रदेश सभाको विशेष अधिवेशनको सुरूआतमै सत्तारूढ एमालेका सांसदहरूले बैठकमा उठेर संसद अवरूद्ध पारेका हुन्।

एमालेका सांसदहरुले कोरोना परीक्षण नगरी बैठक बसालेको भन्दै प्रदेशसभा बैठक अवरुद्ध गरेका हुन् । विशेष अधिवेशनमार्फत बोलाइएको बैठकमा मुख्यमन्त्री पृथ्वीसुब्बा गुरुङ विरुद्ध टेबल गरिएको अविश्वासको प्रस्तावमाथि सोमबारबाट छलफल भैरहेकोछ । सांसदहरुले पीसीआर परीक्षण नगरेको, कोरोनाको दोस्रो डोज नलगाएको र जिल्ला प्रशासन कार्यालयले लगाएको निषेधाज्ञाको अवधीमा बैठक चल्न नदिने एमालेका सांसदले तर्क गरेका छन् । यद्यपी, कोरोनाको नाम देखाएपनि आफ्नो सरकार ढल्ने निश्चित भएपछि एमालेले बैठक अवरुद्ध बनाएको प्रतिपक्षी दलहरुले आरोप लगाएका छन् ।

विशेष अधिवेशनको दोस्रो दिन पनि अविश्वासको प्रस्तावमाथि छलफल सुरु हुनैलाग्दा एमालेका सांसदहरुले उठेर विरोध गरेका थिए । त्यसपछि सभामुखले सांसद राजीव पहारीलाई बोल्न समय दिनुभएको थियो । पहारीले पीसीआर परीक्षण नगरी संसद बैठक बस्न नसक्ने तर्क गर्दै बैठक अघि बढाए अवरुद्ध गर्ने चेतावनी दिनुभयो ।

तर, त्यसअघि बसेको कार्यव्यवस्था परामर्श समिति र सरकारका मन्त्रीहरुसमेतको उपस्थितिमा भएको सर्वदलीय बैठक बसेर आजको कार्यसूची तयार भएको थियो । सभामुखले विशेष अधिवेशन रोक्न नसक्ने बताएपछि पनि एमाले सांसदहरुले उठेर विरोध जनाइरहे । त्यसपछि सभामुखले बैठक १८ मिनेट स्थगित गर्नुभएको छ । गण्डकी प्रदेशसभामा नेपाली कांग्रेसका संसदीय दलका नेता कृष्णचन्द्र नेपालीलाई मुख्यमन्त्रीमा प्रस्तावित गर्दै कांग्रेस, माओवादी केन्द्र र जनता समाजवादी पार्टीले मुख्यमन्त्री पृथ्वीसुब्बा गुरुङ विरुद्ध अविश्वासको प्रस्ताव दर्ता गर्नुभएको हो ।