काठमाडौं, ८ बैशाख । एमाले अध्यक्ष तथा प्रधानमन्त्री केपी शर्मा ओली र वरिष्ठ नेता माधवकुमार नेपालबीचको वार्ता सकिएको छ । करीव डेढ घण्टा लामो वार्तापछि प्रसन्न मुद्रामा नेपाल बाहिरिएका थिए । वार्तास्थलमा रहेका प्रधानमन्त्रीका आर्थिक सल्लाहकार तथा एमाले सांसद मोति दुगडले वार्ता सकारात्मक भएको प्रतिक्रिया दिनुभयो । नेता नेपालले भने कुनै प्रतिक्रिया दिनुभएन । दुगड वार्तास्थलमै रहनुभएको थियो ।

पुस ५ गते प्रधानमन्त्री ओलीले प्रतिनिधि सभा विघटन गरेपछि दुई नेताबीच भेट भएको थिएन । विघटन भएको प्रतिनिधि सभा पुनर्स्थापनादेखि एकीकृत नेकपा भंग हुँदै एमाले र माओवादी केन्द्र ब्यूँतिए पनि अध्यक्ष ओली र नेता नेपालबीच सम्बन्ध सुमधुर हुन सकेको थिएन ।

नेपालसहित उहाँको समूहका २७ जना सांसदलाई एमालेले स्पष्टीकरण सोधेपछि एमालेको दुवै पक्षमाथि मिल्न दबाब परेको थियो ।

दुई नेताबीच भेट तय भएपछि साँझ नेता नेपाल मेरियट पुग्नुभएको थियो । त्यसको सात मिनेटपछि प्रधानमन्त्री पनि पुग्नुभयो । सुरुवाती भेटमा अर्थमन्त्री विष्णु पौडेल पनि सँगै हुनुहुन्थ्यो । अर्कै कार्यक्रमका लागि मेरियटमा रहनुभएका पौडेल भेट सुरु भएलगत्तै बाहिरिनुभयो ।

साँझ करिब ६ बजेदेखि दुई शीर्ष नेताबीच मेरियट होटलको कोठा नम्बर ९०१ मा भेट भएको हो । दुवै नेताबीच भेट भएको केही मिनेटसम्म बोलचाल सुरु भएन । केहीबेरमा प्रधानमन्त्री आफैंले माधव नेपालतिर हेर्दै ‘कस्तो छ तपाईंलाई’ भनेर संवाद सुरु गर्नुभएको थियो ।

तत्कालिन नेकपा रहँदा पुष्पकमल दाहाल प्रचण्डसँग मिलेर प्रधानमन्त्री ओलीलाई अध्यक्ष र प्रधानमन्त्री दुवै पदबाट हटाएको घोषणा गरेपछि दुई नेताबीच तित्तता बढेको थियो । पछि सर्वोच्च अदालतले एमाले र माओवादी केन्द्रलाई अलग अलग दलकोरुपमा पुनर्स्थापना गरिदिएपछि पनि अध्यक्ष ओली र नेपालबीच सम्बन्ध सुमधुर रहेन ।

नेपालको समानान्तर गतिविधि र अध्यक्ष ओलीको स्पष्टीकरणपछि एमाले दुई टुक्रा हुने आशंका बढिरहेकाबेला भएको शीर्ष वार्तालाई चासोका साथ हेरिएको छ ।