जापान, , ४ बैशाख । शनिबार जापानको राजधानी टोकियोमा गैर आवासीय नेपाली संघ (एनआरएनए) जापानले रक्तदान कार्यक्रम सम्पन्न गरेको छ । सोही कार्यक्रममा नेपाली नागरिक सहित जापानी नागरिकको उल्लेख्य सहभागिता रहेको थियो । टोकियो रेडक्रसको सहकार्यमा सिन्जुकु वार्ड स्थित रेडक्रस ब्लड सेन्टरको कार्यालयमा भएको रक्तदानमा कोरोना महामारीका बीच पनि ५५ जनाले रक्तदान गरेका छन् । जसमा ४३ जना नेपाली र १२ जना जापानी नागरिकले रक्तदान गरेको गैर आवासीय नेपाली संघ जापानका प्रवक्ता सिद्धार्थ श्रेष्ठले जानकारी दिनुभयो । रक्तदान जीवनदान भन्ने नारालाई आत्मसाथ गर्दै एनआरएनए जापानले यो कार्यक्रम गत अक्टोवरमा गर्ने योजना बनाएको थियो तर कोरोना महामारीका कारण सोही समयमा गर्न नसकेको र अहिले गर्न सफल भएको बताएको छ ।

कोरोना संक्रमणबाट सुरक्षित रहन सामाजिक दुरी कायम गर्दै सुरक्षाका सबै मापदण्ड पूरा गरेको प्रवक्ता श्रेष्ठले बताउनुभयो । उहाँले कोरोना महामारी बढ्दै गएकोले रगतको अभाव हुन नदिन रक्तदान आयोजना गरेको बताउनुभयो ।

एविसी न्युज संग कुराकानी गर्दै प्रवक्ता श्रेष्ठले सन २०११ मा जापानमा भूकम्प जादा जापानका नेपाली र नेपालले गरेको सहयोगले २०७२ सालको नेपालको भूकम्पमा जापानबाट ठूलो सहयोग भएको स्मरण गर्नुभयो । यस्ता सामाजिक कार्यले नेपाल र जापान बीचको भावनात्मक सम्बन्ध समेत प्रगाढ हुने विश्वास व्यक्त गर्नुभयो । कार्यक्रमको संयोजन एनआरएनए जापानकी महिला संयोजक सगिता अधिकारी सुवेदीले गर्नुभएको थियो ।