काठमाडौं, १६ चैत्र ।  सरकारले चार दिन विद्यालय बन्द गर्ने निर्णय गरेको छ । वायु प्रदुषण अत्यधिक बढेपछि सरकारले विद्यालय बन्द गर्ने निर्णय गरेको हो । शिक्षा , विज्ञान तथा प्रविधि मन्त्रालयमा आज बसेको आकस्मिक बैठकले मंगलबारदेखि ४ दिनसम्म विद्यालय बन्द गर्ने निर्णय गरेको बताइएको छ । वायु प्रदूषणका कारण बालबालिकाको स्वास्थ्यमा गम्भीर असर पर्ने भन्दै मन्त्रालयले विद्यालय बन्द गर्ने निर्णय गरेको हो ।

शुक्रबारदेखि काठमाडौं उपत्यकासहित देशका विभिन्न स्थानमा वायु प्रदूषत निकै बढेको छ । जल तथा मौसमविद्‍का अनुसार लामो समयको खडेरीले हावा सुख्खा भएको छ र, हावाले पानी पार्ने बादलको साटो धुलो र धुँवा लिएर आएको छ । यसका साथै डढेलोका घटना बढेकाले वायु प्रदूषित भएको छ । यसअघि स्वास्थ्य तथा जनसंख्या मन्त्रालयले विज्ञप्ति जारी गर्दै प्रदुषणले गर्दा विभिन्न स्वास्थ्य समस्या देखा पर्ने हुँदा सचेत रहन आग्रह गरेको थियो ।

मन्त्रालयले वायु प्रदुषणले जनस्वास्थ्यमा विभिन्न प्रभाव पर्ने भन्दै घर भित्र नै बस्न अनुरोध गरेको थियो । घर बाहिर खुल्ला स्थानमा नबस्न र घर बाहिर मर्निङ वाकमा नजान सर्वसाधारणलाई अपिल गरेको थियो । त्यस्तै केही दिन यता प्रदुषण बढेसँगै काठमाडौंका उपत्यकाबासीमा रूघाखोकी, दम, एलर्जी, आँखा पोल्ने र अन्य श्वासप्रश्वाससम्बन्धी रोगको जोखिम बढेको र स्वास्थ्य समस्यामा जटिलता थपिँदै गएको स्वास्थ्य तथा जनसंख्या मन्त्रालयले जनाएको छ।

मन्त्रालयका प्रवक्ता डा। जागेश्वर गौतमले वायु प्रदुषण अत्याधिक बढेकाले अनावश्यक रूपमा घर बाहिर ननिस्कन आग्रह गर्नुभएको छ । त्यसैगरी, मन्त्रालयले अनावश्यक रूपमा सवारी साधन नचलाउन अपिल गरेको छ। अत्यावश्यक रूपमा निस्कन परेमा अनिवार्य रूपमा मास्कको प्रयोग र सामाजिक दुरी कायम गर्न डा। गौतमले अनुरोध गर्नुभएको छ । त्यस्तै उहाँले बेलाबेलामा हात, मुख र आँखा सफा गर्न पनि आग्रह गनुभएको हो ।