काठमाडौं, १६ चैत्र । लगातार चौंथो दिन पनि सोमबार उपत्यकासहित मुलुकका विभिन्न सहरको वातावरणीय अवस्था स्थिर देखिएको छ । शुक्रबारयता देशव्यापी रुपमा लागेको डढेलोले काठमाडौंसहितका ठाउँमा बाक्लो तुवाँलो लागेको छ । जसले गर्दा घाम लाग्न सकेको छैन भने बढेको प्रदूषणले आँखा पोल्ने समस्या भएको छ । जल तथा मौसम विज्ञान विभागले सोमबार पनि काठमाडौंको वातावरणीय अवस्थामा सुधार नआउने जनाएको छ । ‘देशव्यापीरुपमा आगो फैलिएको छ । मौसममा आजै सुधार आउने सम्भावना छैन’ मौसमविद् मीनकुमार अर्यालले भन्नुभयो, ‘भोलिबाट हावाको गति बढ्न सक्छ । सुधार हुने आशा राखेका छौं ।’ पहाडी भूभागमा हल्का बदली भएपनि तत्काल पानी पर्ने सम्भावना नरहेको उहाँले बताउनुभयो । सोमबार बिहानसम्म पनि काठमाडौको वायुको गुणस्तर (एक्यूआइ) घातक देखिएको छ । झम्सिखेल ललितपुरको एक्यूआइ सबैभन्दा बढी ४३४ पीएम देखिएको छ । अमेरिकी दूतावासको एक्यूआइ ३१९ पीएम, दरबारमार्गको ३५४, रत्नपार्कको १५२, भैंसेपाटीको ३३६ देखिएको छ ।

वीरेन्द्र स्कुल भक्तपुरको एक्यूआइ ३०३, शंखपार्क काठमाडौंको ३१९ पीएम देखिएको छ । पोखराको एक्यूआइ १४७, नेपालगंजको १५९, दाङको १६२ प्राप्त भएको छ । एयर क्वालिटी इन्डेक्सको १० बजेसम्म काठमाडौं विश्वकै प्रदूषित सहर बनेको छ ।