काठमाडौं, ५ पुस । यो सिजन घरेलु प्रतियोगितामा अपराजित रहेको म्यानचेस्टर सिटी लिग कप फुटबलको सेमिफाइनलमा प्रवेश गरेको छ ।

लेस्टर सिटीलाई टाइब्रेकरमा हराउँदै म्यानचेस्टर सिटीले अन्तिम ४ मा स्थान बनाएको हो । गएराति अवे मैदानमा भएको खेलमा निर्धारित तथा थप गरिएको समयमा १–१ को बराबरी भएपछि खेलको निर्णय टाइब्रेकरबाट लिइएको हो । २६ औं मिनेटमा बेर्नार्डो सिल्भाको गोलबाट पेप गार्डिवलाको टिम म्यानचेस्टर सिटीले सुरुवाति अग्रता लिएको थियो । तर इन्जुरी समयको सातौं मिनेटमा जेमी भर्डीले लेस्टर सिटीका लागि बराबरी गोल गरे । अतिरिक्त समयमा दुई तर्फबाट थप गोल हुन सकेन । त्यसपछि खेलको निर्णय टाइब्रेकरबाट लिइएको हो । जसमा म्यानचेस्टर सिटी ४–३ ले विजयी भयो । टाइब्रेकरमा म्यानचेस्टर सिटीका गोलरक्षक क्लाउडिओ ब्राभोले दुईवटा सुन्दर बचाउ गरे । उनले लेस्टरका रियाद महरेजको पेनाल्टी प्रहार रोके । जितपछि म्यानचेस्टर सिटीका प्रशिक्षक गार्डिवलाले आफू निकै खुशी भएको बताएका छन् । प्रिमियर लिगको लिडर म्यानचेस्टर सिटीले लिग कपसहित च्याम्पियन्स लिग र एफए कपमा पनि राम्रो गरिरहेको छ ।