काठमाडौं, ४ फागुन । प्रतिनिधिसभा विघटनविरूद्धको रिटमा सर्वोच्च अदालतको संवैधानिक इजलासमा एमिकस क्युरीले आफ्नो धारणा राख्न थालेको छ । सोमबार रिट निवेदकको जवाफ सकिएपछि आज अदालतको सहयोगी भनेर चिनिने एमिकस क्युरीले आफ्नो राय दिन थालेको हो । नेपाल बार एसोसियसनको तर्फबाट एमिकस क्युरीमा रहेका कानून व्यवसायी बद्रीबहादुर कार्कीले अहिले राय दिईरहनु भएको छ ।  प्रधानन्यायाधी चोलेन्द्र शमशेर जबराले समयको ख्याल गरेर राय दिन अनुरोध गर्नुभएको छ ।

प्रतिनिधिसभा विघटनविरूद्धका मुद्दामा प्रधानन्यायाधीश जबराको इजलासले एमिकस क्युरी गठन गर्ने फैसला गरेको थियो । एमिकस क्युरीमा बारको तर्फबाट कार्की, सतीशकृष्ण खरेल र विजयकान्त मैनाली छन् भने सर्वोच्च अदालत बारको तर्फबाट पूर्णमान शाक्य र गीता पाठक चयन भएका थिए । प्रतिनिधिसभा विघटनविरुद्ध सर्वोच्च अदालतमा विचाराधीन मुद्दामा कानुन व्यवसायीहरूले सोमबार जवाफी बहस सकेपछि आज एमिकस क्युरीको पालो आएको हो । प्रधानन्यायाधीश चोलेन्द्रशम्शेर जबरा, न्यायाधीशहरू विश्वम्भरप्रसाद श्रेष्ठ, अनिलकुमार सिन्हा, सपना मल्ल र तेजबहादुर केसीको संवैधानिक इजलासमा सुनुवाइ भइरहेको छ । गत माघ ४ गतेदेखि संवैधानिक इजलासमा विषय केन्द्रित बहस शुरु भएको थियो ।