काठमाडौं, २७ माघ ।  प्रधानमन्त्री केपी शर्मा ओली निर्वाचन आयोग पुगेर फर्किनु भएको छ । निर्वाचन आयोगको तयारीबारेमा जानकारी लिएर प्रधानमन्त्री ओली फर्किनुभएको हो । आगामी वैशाख १७ र २७ गते हुने मध्यावधि निर्वाचनको तयारीका विषयमा निर्वाचन आयोगका प्रमुख आयुक्त लगायतसित जानकारी लिएर फर्किएको प्रधानमन्त्रीका प्रेस सल्लाहकार सूर्य थापाले जानकारी दिनुभयो । आयोगका प्रमुख आयुक्त दिनेश थपलियाले निर्वाचनको तयारीमा आयोग जुटेकोबारेमा पनि जानकारी गराउनु भएको थियो ।

नेकपाको विवादका विषयमा खास छलफल नभएको प्रेस सल्लाहकार थापाले बताउनुभयो । उहाँले भन्नुभयो , ‘पार्टीको अध्यक्षका हैसियतले भन्दा पनि आज प्रधानमन्त्रीको हैसियतमा आयोग आउनुभएको हो ।’ निर्वाचन आयोगको तयारीबारे जानकारी लिएपछि आयोगलाई धन्यवाद दिनुभएको छ । प्रधानमन्त्रीका साथमा उपप्रधानमन्त्री ईश्वर पोखरेल, अर्थमन्त्री विष्णुप्रसाद पौडेल, कानुन मन्त्री लीला श्रेष्ठ तथा संसदीय दलका उपनेता सुवासचन्द्र नेम्वाङ पनिसगै जानुभएको थियो । सोमबार साँझ बसेको मन्त्रिपरिषद् बैठकले यसअघि नै घोषित मितिमा दुई चरणमा निर्वाचन गर्ने निर्णय गरेको छ । पहिलो चरणमा वैशाख १७ गते प्रदेश २, लुम्बिनी, कर्णाली र गण्डकीका ४० जिल्लामा र दोस्रो चरणमा २७ गते वाग्मती, प्रदेश १ र सुदूरपश्चिम प्रदेशका ३७ जिल्लामा निर्वाचन गर्ने निर्णय गरेको छ ।