काठमाडौं, १८ असोज । सत्तारुढ नेपाल कम्युनिस्ट पार्टी (नेकपा)को सचिवालय बैठक स्थगित भएको छ । प्रधानमन्त्री एवं पार्टी अध्यक्ष केपी शर्मा ओलीको सचिवालयका चार सदस्य र ७६ सुरक्षाकर्मीमा कोरोना संक्रमण पुष्टि भएपछि बैठक स्थगित गरिएको हो ।

पछिल्लो समय सरकारले गरेको राजनीतिक नियुक्तबारे पार्टीमा प्रश्न उठेपछि बैठक बोलाइएको थियो । आज अपरान्ह ४ बजेका लागि तय भएको बैठक स्थगित भएको हो । बैठक स्थगित भएको जानकारी प्रचण्डको सचिवालयले अन्य पदाधिकारी तथा सदस्यहरुलाई जानकारी दिएको छ । आजको बैठकमा सरकारले गरेको राजदूत नियुक्ति, प्रदेश ५ को राजधानी तोक्ने विषय, मन्त्रिमण्डल पुर्नगठनलगायतका विषयमा छलफल हुने भएको थियो ।

सरकारले पार्टी भित्र छलफल नै नगरी नियुक्तिहरु गरेकोमा पार्टी भित्र असन्तुष्टि बढ्दै गएको बेला यस बैठकलाई महत्वपूर्ण रुपमा हेरिएको थियो । अध्यक्ष प्रचण्डसहित वरिष्ठ नेताहरु माधवकुमार नेपाल, झलनाथ खनाल, प्रवक्ता नारायणकाजी श्रेष्ठले बैठकमा सरकारले गरेका निर्णयहरु प्रति आफ्नो असन्तुष्टि राख्ने तयारी गरेका थिए । स्थायी कमिटीले गरेका निर्णय कार्यान्वयन नगरेको, पार्टी एकीकरणको प्रक्रिया अघि नबढेको र केहि साता अघि भएको भनिएको सहमति कागजमा मात्र भएको भन्दै असन्तुष्टि फेरी बढ्दै गएको छ । अर्को बैठकको मिति तोकिएको छैन ।