काठमाडौं, २ भदौ । युट्युवमा नेपालको राष्ट्रियता एवं जातीय सद्भावविरुद्ध घृणा फैलाउने गरी आपत्तिजनक शब्दहरुले भरिएको गीत सार्बजनिक गरिएकोमा विरोध भएको छ ।

‘देशद्रोही’ शीर्षकको उक्त गीत ‘मंगोल हप अफिसियल’ नामक च्यानलबाट सोमबार अपलोड भएको हो । गीतमा देशविरोधी आपत्तिजनक शब्दहरु प्रयोग गरिएको छ । म्युजिक भिडियोमा नेपालको झण्डा जलाइएको दृश्य समेत समावेश गरिएको छ । गीतलाई प्रतिबन्धित गरी यसमा संलग्न व्यक्तिहरुलाई कारबाही गर्न सामाजिक सञ्जाल प्रयोगकर्ता र राप्रपा निकट प्रजातान्त्रिक विद्यार्थी संगठनले माग गरेको छ ।

र्‍याप जनरामा गाइएको गीतको लिरिक्स र्‍यापरका रुपमा मंगोल ग्याल्ज ली एन्ड एटीएम उल्लेख छ । राप्रविसका महासचिव जनक फडेराले सामाजिक सद्भावमा खलल पुर्याउने यो गीत प्रति आफ्नो संगठनको ध्यानाकर्षण भएको भन्दै संबिधानले समेत अपराध मानेको झण्डा जलाइएको यस गीतलाई बन्देज लगाई अपराधमा संलग्नलाई कारवाही गर्न माग गरेको छ । साथै महासचिव फडेराले दोषीलाई कारवाही नगरे कडा संघर्षमा उत्रिने चेतावनी समेत दिएका छन् ।

राप्रपाका नेता एवं सांसद राजेन्द्र लिङदेनले समेत सामाजिकमा प्रतिक्रिया दिदै जातीय घृणा फैलाउने र राष्ट्रिय झण्डा जलाउने कार्य कुनै पनि अर्थमा र कदापि स्वीकार्य नहुने बताएका छन् ।

भिडियोमा प्रधानमन्त्री केपी शर्मा ओली, नेकपा अध्यक्ष तथा पूर्व प्रधानमन्त्री पुष्पकमल दाहाल प्रचण्ड, पूर्व प्रधानमन्त्री गिरिजाप्रसाद कोइराला, सुशील कोइराला, माधवकुमार नेपाल, पूर्वराजा ज्ञानेन्द्र शाह लगायतको तस्बिर जलाइएको छ ।

भिडियोमा मकवानपुरको पूर्वी बागमती गाउँपालिका–३ सल्लेनीस्थित विष्णु आधारभूत विद्यालयको क्षेत्र देखिएको छ ।

मुलुकी अपराध संहिता २०७४ अनुसार राष्ट्रिय गान वा राष्ट्रिय झण्डाको अपमान वा क्षति गर्नु हुन्न। कसैले राष्ट्रिय झण्डाको अपमान गरेमा कानुन अनुसार ३ वर्ष कैद सजाय, ३० हजार जरिवाना वा दुबै हुनसक्नेछ