काठमाडौं, ३२ साउन ।  उपत्यकाका तीन जिल्ला काठमाडौं, भक्तपुर र ललितपुर जिल्लाका प्रशासन कार्यालयबाट जारी आदेशको प्रभावकारी कार्यान्वयन गराउन अनुगमन टोलि खटिएको छ । उपत्यकाका तीन ओटा जिल्लामा जिल्ला प्रशासन कार्यालय, प्रहरी, शसस्त्र प्रहरी, राष्ट्रिय अनुसन्धान, स्वास्थ्यकर्मीको टोलि अनुगमनको लागि परिचालन भएको हो ।

जिल्ला प्रशासन कार्यालय ललितपुरले सवारी साधन साधनहरुमा जोरबिजोरको कार्यान्वयन, ठूला मल तथा सपिङ सेन्टर, सैलुन तथा व्यूटीपार्लरहरु खुले नखुलेको हेर्न चारओटा टिमले अनुगमन सुरु गरेको छ । साउन ३० गते प्रमुख जिल्ला अधिकारी नारायणप्रसाद भट्टले जारी गरेको आदेश विपरित हुने कृयाकलाप रोक्न चारओटा अनुगमन समिति परिचालन भएको हो ।

जिल्ला प्रशासन कार्यालय ललितपुरका प्रमुख जिल्ला अधिकारी नारायणप्रसाद भट्टले रेष्टुरेन्टहरुले निर्देशन पालना गरे नगरेको, भिडभाडको अवस्था, सामाजिक दुरी कायम भएको नभएको र मास्कको प्रयोग नभएमा कारवाही गर्ने अधिकार प्रदान गरेर चारओटा टिम सक्रिय भएर लागेको जानकारी दिनुभयो । उहाँले परिचालन भएको टिमले तत्कालै कारवाही गर्न सक्ने बताउनुभयो ।

जिल्ला प्रशासन कार्यालयले जारी गरेको निर्णयको परिपालन गर्ने बिषयमा अनुगमन गर्न र कोरोनाको संक्रमण रोक्नको लागि चारओटा टोली परिचालन भएको प्रमुख जिल्ला अधिकारी भट्टले जानकारी दिनुभयो । टोलीमा जिल्ला प्रशासन कार्यालय, स्थानीय तहका प्रतिनिधी, जिल्ला प्रहरी कार्यालय ललितपुर तथा घरेलु तथा साना उद्योगका कर्मचारीहरुले चारओटा समुह बनाएर अनुगमन गरिरहेको प्रजिअ भट्टले गोरखापत्र अनलाइनलाई बताउनुभयो ।

त्यस्तै जिल्ला प्रशासन कार्यालय भक्तपुरबाट प्रमुख जिल्ला अधिकारी हुमकला पाण्डेले जारी गरेको आदेशको कार्यान्वयमा चारओटा टोली भक्तपुर जिल्लाभर परिचालन भएको सहायक प्रमुख जिल्ला अधिकारी एंव सूचना अधिकारी दुर्गादत्त ढकालले बताउनुभयो ।
उहाँले टोलीले साउन ३० गतेदेखि कार्य सुरु गरिसकेको बताउनुभयो । कोराना महामारीको जोखिम कम कसरी गर्न सकिन्छ भनेर टोलि परिचालन भैसकेको उहाँले बताउनुभयो । टोलीले सामाजिक दुरी कसरी कायम गराउन, जोर बिजोरको लागू गराउन, भिडभाडको अवस्थाको बारेमा अनुगमन गर्ने कार्य गरेको सूचना अधिकारी ढकालले जानकारी दिनुभयो ।

परिचालन भएको टोलीले दुई दिनमा मास्कको प्रयोग नगर्ने ३३८ जनालाई एक सय रुपियाँ जरिवाना गराएको बताउनुभयो । आदेश अवज्ञा गर्दै जोर विजोर नमान्ने ४७ ओटा दुई पाग्रे तथा ४६ ओटा चार पाग्रे सवारीहरुलाई दिनभर होल्ड गरेर राखिएको ढकालले बताउनुभयो ।