काठमाडौं, ३१ असार । नेपाल–भारत सम्बन्धका जानकार तथा भारतका वरिष्ठ राजनीतिज्ञ करण सिंहले रामबारे नेपालका प्रधानमन्त्री केपी ओलीको अभिव्यक्तिले विश्वभरका हिन्दू धर्मावलम्बी मर्माहत बनेको टिप्पणी गरेका छन् ।

रामको जन्म पूर्वी नेपालको एक गाउँमा भएको र भारतले कृत्रिम अयोध्या तयार गरेको भन्दै ओलीले दिएको अभिव्यक्तिले आफू आश्चर्यचकित भएको सिंहको भनाइ छ ।

भारतका मात्र नभएर नेपालका अनि विश्वभरका करोडौं हिन्दू धर्मावलम्बी मर्माहत भएको भन्दै सिंहले प्रधानमन्त्री ओली सकेजति जे पनि गर्न उद्धत रहेको आरोप लगाएका छन् ।

ओलीको राम र अयोध्या अभिव्यक्तिले दुई देशबीचको दूरी अझ बढाउन खोजेको भन्दै सिंहले दुबै देशका बौद्धिक बर्गले दुई देशबीचको वर्षौँदेखिको सुमधुर सम्बन्ध पुनर्बहाली गर्न काम गर्नुपर्ने आग्रह गरेका छन् ।

यसैबीच भारतका विश्व हिन्दू परिषद, श्री राम जन्मभूमि ट्रष्ट र आयोध्याका सन्तहरुले नेपालका प्रधानमन्त्री ओलीलाई भगवान रामलाई क्षेत्रीय राजनीतिबाट टाढा राख्न आग्रह गरेका छन् ।

प्रधानमन्त्री ओलीले भानुजयन्तीको अवसरमा बालुवाटारमा आयोजित कार्यक्रममा सीता भारतका नभएर अयोध्याका रामलाई दिएको र त्यो अयोध्या वीरगन्ज पश्चिमको गाउँ भएको विवादास्पद अभिव्यक्ति दिएका थिए । ओलीको यही भनाइलाई लिएर नेपाल(भारतमा आलोचना भइरहेको छ । भारतको सत्तारुढ भारतीय जनता पार्टी (भाजपा), विपक्षी भारतीय राष्ट्रिय कांग्रेसदेखि भारतका सन्त–महन्तहरुले समेत चर्को विरोध गरेका छन् । भारतीय सन्तमहन्तहरुको छाता संगठन राष्ट्रिय अखाडा परिषद्ले ओलीले माफी माग्नु पर्ने बताएको छ ।

पछिल्लो समय भारतले नेपाली भूमि लिम्पियाधुरा, लिपुलेक र कालापानी क्षेत्रमा सडक बनाएपछि नेपालले त्यसको प्रतिवाद गर्दै नयाँ नक्शा जारी गरेको छ । दुई देशबीच संवादसम्म हुन सकेको छैन ।